Күрэс сыалын-соругун ситтэ

Олунньу  18 күнүгэр Хатастааҕы оҕо ускуустубатын оскуолатыгар норуодунай үнүстүрүмүөннэргэ  (баян, аккордеон, гитара, балалайка, домбра) үөрэнэр оҕолор икки ардыларыгар зональнай күрэс 18-с төгүлүн буолан ааста. Куонкурус  аата — «Сулустар параадтара», бырайыак ааптарынан үлэтигэр дьиҥ чахчы  бэриниилээх, үлэттэн дьолу билбит  Семенова Анна Титовна буолар.

Бу куонкурус  үөрэнээччи уонна үөрэтээччи биир тыыҥҥа, биир тэтимҥэ киирэн үлэлээн-хамсаан таһымнарын үрдэтэллэригэр, сатабылларын улаатыннаралларыгар, саҥа ааттары таһаарарга туһуламмытын ааһан,  талааннаах, чаҕылхай үөрэнээччи П.Егоров аатын үйэтитэр үтүөкэн сыаллаах-соруктаах. Туппутун хаһан да ыһыктыбат, саҕалаабытын бырахпат Анна Титовна биир идэлээхтэрин, үлэлиир Хатастааҕы оҕо ускуустубатын оскуолатын көмөтүнэн бырайыак бу 18 сыл тухары биир да сыл тохтообокко буолар. Онон,  этэргэ дылы,  бу үөһээ ааттаммыт үнүстүрүмүөннэргэ үөрэнэр уонна үөрэтэр дьон күүтэр, кэтэһэр уонна анаан бэлэмнэнэр күрэстэригэр кубулуйда.

Ханнык баҕарар күөн көрсүһүү  күрэскэ дьүүллүүр сүбэ састаабын таһымыттан улахан тутулуктаах. Дьэ,  бу чааһыгар “Сулустар параадтара”   дьүүллүүр сүбэтэ чахчы да сулустуу чаҕылхай, кырдьык да кылаан. Санаан да көрүҥ,  бүтүн Арассыыйа таһымнаах улахан куонкурустар кыайыылаахтарын иитэн-үөрэтэн таһаарбыт, бэйэлэрин эйгэлэригэр көмүс буукубанан суруллар СӨ култууратын үтүөлээх үлэһиттэрэ, дорҕоонноох ааттаах Раиса Николаевна Крылова уонна Анастасия Васильевна Каженкина, Ф.И. Авдеева аатынан оҕо айымньытын дьиэтин уһуйааччыта, куорат таһымыттан саҕалаан норуоттар икки ардыларынааҕы үгүс элбэх куонкурустар лауреаттара  Раджана Михайловна Погодаева, Дьокуускайдааҕы мусукаалынай кэллиэс  оркестрын кылаабынай дирижера, үгүс элбэх араас таһымнаах куонкурустар кыайыылаахтара Михаил Александрович Погодаев састааптаах дьүүллүүр сүбэ үлэлээбитэ элбэҕи кэпсиир.

Быйылгы күрэскэ алта оскуолаттан 55 оҕо —  34 струналаах үнүстрүмүөннэргэ, 21 баяҥҥа оонньоон кытынна. Мэҥэ Хаҥаластан, Дьокуускай куораттан, куораты тула олорор нэһилиэктэртэн кэлбит оҕолор  эмиэ да долгуйа, куттана, эмиэ да үөрэ-көтө, сүргэ көтөҕүллэ Үрдүк сололоох  Муусука үрдүк аатын күөрэччи тутан,  муусука уйаҕас долгунугар киллэрдилэр.

Кыайыы-хотуу өрөгөйүн билбит элбэх оҕоттон биири чорботон бэлиэтиирбин уонна киэн тутта кэпсиирбин көҥүллээҥ. Быйылгы күрэс муҥутуур кыайыылааҕынан, Кылаан бириис хаһаайынынан Хатастааҕы оҕо ускуустубатын оскуолатын баян кылааһын үөрэнээччитэ Васильев Игорь буолла.  Учуутала, уһуйааччыта Капитонова Светлана Ивановна Хатаска 2018 сыллаахтан үлэлиир. Онон,  кинилэр 5 сыллааҕы сыралаах үлэлэрин түмүгэ буолар. Бу улахан кыайыы иннигэр сылтан сыл эбилиннэр эбиллибит сатабыл, кырыыламмыт талаан, буһуу-хатыы уонна үлэ, үлэ уонна өссө төгүл үлэ түмүгэ буоларын бары да өйдүүбүт. Светлана Ивановна муусука эйгэтигэр, чуолаан баяҥҥа саҥа иһиллэр аат буолбатах,  бу иннигэр кини өр сылларга Мэҥэ Хаҥалас Майатыгар таһаарыылаахтык, үтүө суобастаахтык үлэлээбит. Онон биһиги ис сүрэхпититтэн үөрэн туран үөрэнээччи уонна уһуйааччы кэккэ сылларга үлүмнэһэ үлэлээбит үлэлэрин, тулуур, дьулуур, дьаныар түмүгэ буолан кылбайан кэлбит Кылаан бирииһинэн иккиэннэрин эҕэрдэлиибит.

Манна даҕатан эттэххэ,  баян кылааһыгар бу куонкурус устуоруйатыгар  бастакы түгэн буолар. Игорь бу иннигэр бу оскуола хореография кылааһын ситиһиилээхтик үөрэнэн бүтэрбитин бэлиэтиири наадалааҕыынан ааҕабыт.

Дьэ, ити курдук 18-с сылын ыытыллыбыт “Сулустар параадтара” саҥа сулуһу чаҕылыта уматта, үрдүк үрдэлгэ үктэннэрдэ.

Наталья РУФОВА, ааптар хаартыскалара