Хаартысканы Елизавета Наумова тиксэрдэ.
Бүлүү улууһун Кыргыдай нэһилиэгэр салаллан кэлбит сандал сааһы көрсө, үйэлээх кэмнэргэ аһатан олорбут Бэти күөлбүтүгэр киирэн кыһыммытын атааран, бэрт үчүгэйдик астынан, бырааһынньыктаан, биир үүммүт үтүө күммүтүн сэргэхтик атаардыбыт.
Унньуктаах уһун, кыыдааннаах кыһыммытыттан сылайбыт курдук буолан, сааскы ыйы уруйдаан тэрийэр талааннах олохтоох “Туску” сынньалаҥ киинин култууратын үлэһиттэрэ, чуолаан Галина Егоровна Осипова, Аэлита Семеновна Васильева, ону кытта бары үлэһиттэрэ бэрт тэрээһиннээхтик тэрийэн ыыттылар. Олохтоох дьаһалта дьаһалынан, Кыргыдайбыт олохтооҕо Леонид Николаевич Егоров быйылгы халыҥ хаартан толлон турбакка, дьаныһан туран күттэрэн, күөлбүт күөх ньуурун таһааран нэлэтэн кэбиспитэ киһини сөхтөрдө! Махтал бастыҥын аныыбыт Леонид Николаевичка!
Бу күн оонньуу оройуттан тутулунна, хорчуоппа сыта күөлү ылан кэбистэ, дьиэ маанылаах хаһаайкалара — ийэлэр, эбээлэр, эдьиийдэр дьиэтээҕи түбүктэн сынньана түһэн оҕо-аймаҕы кытта тэҥҥэ үөрдүлэр-көттүлэр! Оҕолор оонньоон, салгын сиэн имнэрэ кылабачыйа кыыста.
Эр бэртэрэ, дьиэ аҕа баһылыктара саас кэлбитин уруйдаан дьолломмут, сырдаабыт сирэйдэрэ киһиэхэ биллэ быраҕылынна! Былчыҥ быыппастар оонньууларыгар кытыннылар. Хайа, уонна, кыһыны атаара охсон сотору кэминэн кустара кэлиэ турдаҕа! Ол курдук, “Байанай-2023” күрэскэ тэрилтэлэрбит икки ардыгар тыҥааһыннаах, мускуурдаах күрэхтэһии түмүгүнэн олоҕу-дьаһаҕы ититэр тэрилтэ ГУП ЖКХ тэрилтэтэ бастакы миэстэ, “Кыргыдай” ТХПК иккис миэстэ, Д.А.Гуляев аатынан оскуола үһүс миэстэ, дьаһалта хомуллуулаах хамаандата төрдүс миэстэ буоланнар үөрдүлэр-көттүлэр.
Хорчуоппа быыстала суох үлэлээтэ. Оҕо аймахха бэлисипиэт ойутуута, сүүрүү-хайыһар күрэҕэ, дьахталларга хаатыҥка быраҕыыта, түөлбэнэн билиинэ күрэҕэ, сылабаар киэргэтиитэ, эр бэртэрбитигэр гиирэ быраҕыыта, массыына соһуута, буранынан куоталаһыы — кыһыны атаарыыбыт бырааһынньыгын өссө тупсаран, киэргэтэн, ситэрэн биэрдэ! Ити курдук кыргыдайдар инникигэ эрэллээх, олохпут кэскилэ бэйэбит илиибитигэр буоларын умнубакка, аныгылыы сайдыылаах олоҕу кытта тэҥҥэ хаамсан айабыт-тутабыт.
«Кыргыдай» МТ исписэлииһэ Елизавета Константиновна Наумова.
Ахсынньыга үөрэх үлэһиттэрин саамай улахан күөн күрэһэ — Бүтүн Арассыыйатааҕы “Сыл учуутала‑2025” күөн күрэс өрөспүүбүлүкэтээҕи…
2026 сыл зодиак бары бэлиэлэригэр уларытыыны, бэлэҕи бэлэмнээн турар. Сорохтору дьылҕаларын быһаарар көрсүһүү, үлэҕэ үрдээһин…
sakha-sire.ru саайт «Кэпсээннэ истиэҕиҥ» диэн бырайыагар «Саха сирэ» хаһыат суруналыыһа Людмила Попова "Оҕо кута" кэпсээнин…
2026 сыл хайдах буолуоҕун Саха сиригэр киэҥник биллибит экстрасенс Алексей Иванович Божедонов‑Сырдык хаһыаппыт ааҕааччыларын кытары…
Тохсунньу – Таҥха Хаан Айыы ыйа. Тохсунньу тутула Тохсунньуну былыр бүтэй кэм дииллэрэ. Хотугу сахалар…
Саха сиригэр саҥа сыл саҕаланыытыгар тыаллаах уонна тымныы күн-дьыл турарын туһунан Саха сиринээҕи гидрометеокиин иһитиннэрэр. …