Күргүөмүнэн оттуур ходуһаларын бэлэмнээтилэр

«Ходуһа баар — сүөһү баар, сүөһү баар — киһи баар, киһи баар — оҕо баар, оҕо баар — уһуйан, оскуола, балыыһа, кулууп баар. Итилэр баалларын тухары нэһилиэк баар» диэн бииргэ төрөөбүт убайым Уоһук Сэмиэнэбис Уйбаныап этэринии, тыа дьонугар от үүнүүтэ, ходуһа бүтүн буолуута улахан оруоллаах.

Орто Амма нэһилиэгин дьаһалтатын тыа хаһаайыстыбатыгар исписэлииһэ Винокурова Светлана Петровна олус үчүгэйдик үлэлиир. Барытын эрдэттэн тэрийэн-бэрийэн иһэрин киһи эрэ сэргиир, хайгыыр. Соторутааҕыта кини сүрүннээһининэн Амма эбэбит уҥуор Төрүт хочотугар оттуур сирдээх дьон ходуһа абыраҕар күргүөмүнэн үлэлээтилэр. Светлана Петровна, Дария Николаевна Колодезникова, дьаһалта үлэһитэ Юлия Рудольфовна Афанасьева тахсыһан, үлэһиттэргэ сылаас миини ыргыччы буһаран иһэртилэр, чэй өрдүлэр. Үлэ күөстүү оргуйда.

Баһылык Альберт Иустинович Кулачиков бэйэтинэн көҕүлээн, бэртээхэй туһалаах тэрээһин буолан ааста. Мантан сайын, халлаан ардаан ньүөлсүттэр, отчуттар кыстыыр отторун булунуохтар этэ.
Тыа дьонун сайыҥҥы түбүгэ манан эрэ бүппэт. Сайыны быһа уһун кыһыны этэҥҥэ туораары былдьаһыктаах күннэри куоттарбакка, үрдүк үүнүү, өҥ-быйаҥ кэлэрин туһугар быыстала суох түбүгүрэллэр.

Валентина КРИВОШАПКИНА, Харбалаах, Таатта