“Кыргызстаны сөхтөрөн кэллибит”

Саха сиригэр РФ үтүөлээх, өрөспүүбүлүкэ образцовай “Кэнчээри” ырыа-үҥкүү ансаамбылын билбэт киһи суоҕун кэриэтэ  буолуохтаах. Бүгүн ансаамбыл Кыргызстан Өрөспүүбүлүкэтиттэн көтөн кэллэ.

“Биһиги Кыргызстаҥҥа саха, кыргыз оҕолорун доҕордоһуннарар, саха норуотун култууратын толору көрдөрөр улахан соруктаах барбыппыт, — диэн кэпсиир салайааччы РФ, СӨ култууратын үтүөлээх үлэһитэ Василий Парников. – Ил Түмэн вице-спикерэ Александр Жирков көҕүлээн, бырабыыталыстыба, Ил Дархан бэйэтинэн өйөөннөр, үбүлээннэр баран кэллибит. Бу барыта  “Кэнчээри” ансаамбыл 50 сыл устата саха норуотун аатырдан кэлбитин билинии, таарыччы бэйэм 80 сааспынан бэртээхэй бэлэх буолла”.

Ансаамбыл Кыргызстаҥҥа атырдьах ыйын 18-27 күннэригэр сырытта. Кинилэри уруккута Кыргызстан Өрөспүүбүлүкэтин парламенын салайсыбыт Сатина Акматалиевна Бакешова ытыһын үрдүгэр түһэрэн илдьэ сылдьыбыт. Сатина Акматалиевна биһиги Александр Жирковпутун кытта Киргизия Киин Кэмитиэтин бастакы сэкирэтээринэн үлэлээбит Максим Аммосов аатын тилиннэриигэ элбэхтик бииргэ алтыспыттар. Сатина Акматалиевна архыыптары хасыһан, Максим Аммосов туһунан бэрт элбэх докумуону булан,  бэртээхэй кинигэни таһаартарбыт. Оттон Александр Жирков Бишкек биир сүүнэ пааркатыгар сир туруорсан, Максим Аммосов бюһун туруортарбыт.

“Дьэ ол өйдөбүнньүк иннигэр биһиги хаартыскаҕа түстүбүт, саха, кыргыз гиимнин ыллаатыбыт, үҥкүүлээтибит”, — диэн салгыы кэпсиир Василий Степанович. – Кэлиэхпит иннинэ Бишкекка улахан пааркаларыгар кэнсиэртээтибит. Мин уруккуттан ааптарыскай бырагыраамалаахпын – саха фольклоруттан саҕалаан аан дойду классикатын толоруу. Инньэ гынан дьоҥҥо бу саха норуотун оҕолоро наһаа да талааннаахтар диэн өйдөбүлү хаалларабыт. Бу да сырыыга пааркаҕа элбэх киһи мустан турдаҕына ыллаатыбыт-үҥкүүлээтибит, Кыргызстан гиимнин ыллаабыппытыгар дьон ойон туран, сүрэхтэрин туттан туран тэҥҥэ ылластылар”.

Саха оҕолорун сөхтөрүүлэрэ манан эрэ муҥурдамматах. Кинилэр онно Благотоворительнай христианскай лааҕырга олорбуттар. Манна кинилэр Кастальскай “Малая ектения” литургиятын, Каччини «Аве Мариятын»  түөрт куолаһынан ыллааннар, олох куттарын туппуттар, сөҕүү бөҕөнү сөхпүттэр.

“Дьэ итинник патриотическай-бэлитиичэскэй, ону кытта култуурунай сорукпутун толорон кэллибит. Александр Николаевич аэропуорка бэйэтинэн киирэн көрүстэ. Маннык улахан дьыалаҕа эрэнэн, үбүлээн ыыппыттарын иһин киниэхэ, Ил Дархаҥҥа, бырабыыталыстыбаҕа махталбыт муҥура суох, — диэн Василий Парников ситиһиилээх сырыытын түмүктээтэ.