Кырсаһыттары, балыксыттары хоһуйуохтара

Аллайыаха улууһун Бөрөлөөх нэһилиэгэр төһө да суол-иис суох буоллар, олус сэргэхтик олороллор.

Ол курдук, өрөспүүбүлүкэ Ил Дархана Айсен Николаев биллэрбит “Үлэ сылынан” сэтинньи  бүтүүтэ урукку балыксыт, кырсаһыт өбүгэлэрин, үлэһит туруу дьону ахтан  ааһаары “Геван” култуура киинэ улахан кэнсиэр бэлэмнии сылдьар.

Манна оскуола үөрэнээччилэрэ бу Бөрөлөөххө олорон, үлэлээн ааспыт тыыл бэтэрээнэ, олохтоох бэйиэт Алексей Лебедев-Хоноһо хоһооннорунан литературнай монтажка кытталлар. Онно Хоноһо хоһуйбут кырсаһыттара, байанайдаах булчуттара ахтыллыахтара.

Таарыйа ахтан аһардахха, ахсынньы саҥатыгар олохтоох оскуола альбом-кинигэтэ сүрэхтэниэҕэ. Билигин кинигэ бэчээттэнэн, кырыы дэриэбинэҕэ айаннаан иһэр. Ол курдук, бу оскуола икки сыллааҕыта төрүттэммитэ 75 сылын туолбута. Ону хамсык мэһэйдээн, кыайан бэлиэтээбэтэхтэрэ. Саҥа кинигэ тахсыыта ол кэрэ-бэлиэ күнү санатыаҕа.