Кырыктаах ньээҥкэҕэ бириигэбэр таҕыста

Дьокуускай куоракка 34 саастаах кырыктаах ньээҥкэ  туһунан биһиги хаста даҕаны суруйан турабыт. Бэлиэтээн суруйдахха, бу сыл тохсунньутугар социальнай ситимҥэ оҕолору көрө хаалбыт ньээҥкэ оҕолору кырбыырын туһунан видео киэҥник тарҕаммыта.

Бу ньээҥкэ оҕолору быстах кэмҥэ көрөн харчылаһан олорбут. Икки оҕолоох ийэ үлэлиир буолан, оҕолорун кыһалҕаттан ньээҥкэҕэ көрдөрбүт. Ол эрээри оҕолор майгылара уларыйбытын көрөн ийэ сэрэхэдийэн, кыбартыыратыгар кистээн видеокамера холбообут. Дьэ, итинтэн барыта саҕаламмыта. Кырыктаах ньээҥкэҕэ  Арассыыйа Федерациятын холуобунай кодексатын 117 ыст 2 ч. «а» уонна «г» пууннарынан (бэйэлэрин көмүскэнэр кыаҕа суох сирэйдэри атаҕастааһын) диэнинэн холуобунай дьыала тэриллибитэ. Бу ыстатыйанан кырыктаах ньээҥкэҕэ үс сылтан сэттэ сылга диэри хаайыы болдьоҕо ууруллуохтааҕа. Бүгүн, ыам ыйын 19 күнүгэр,  суут 34 саастаах ньээҥкэни үс сыл хаайыы болдьоҕор уураахтаата.