Кыстатыам олохтоохторун ыйытыылара, туруорсуулара элбэх

Олунньу 8 күнүгэр СӨ Бырабыытылыстыбатын отчуотун Эдьигээҥҥэ Кыстатыам олохтоохторо иһиттилэр.

Кыстатыам оройуон кииниттэн 90 км тэйиччи турар эрээри, өрүс нөҥүө уонна, уопсайынан, суола-ииһэ уустук буолан, улахан кыһалҕалара кэлиини-барыыны кытта сибээстээх. Биир долгутар улахан кыһалҕаларынан — «Кулибин» теплоход сырыытын ахсаана аччаабыта, төлөбүрэ ыарахана буоларын эттилэр. Бу боппуруоһу истэн баран, отчуокка сылдьар дэлэгээссийэ кыттыылааҕа, СӨ Уу уонна тимир суол департаменын салайааччытын солбуйааччы Любовь Винокурова үөрэтиэх буолла.

Артур Ильинов таба иитиитин сайыннарыы боппуруоһун көтөхтө, субсидия кээмэйин быһааран биэрэргэ көрдөстө. Тыа хаһаайыстыбатын министиэристибэтин бэрэстэбиитэлэ Прокопий Николаев: «таба иитиитэ олус барыстаах, элбэҕи биэрэр хайысха, табаҕыт төбөтүн үксэтиэх тустааххыт», — диэн эттэ. Эдьигээн улууһа «таежнай оленеводство» диэн салаанан муҥутуур үрдүк дотацияны ылар эбит. Бу кыһын Кыстатыамҥа 500 төбө табаны атын улуустан тиксэриэхтэрэ. Онуоха билигин олохтоох табаһыттартан ыстааданы үүрэн аҕалыахтаах үлэһиттэри бэлэмнэнии сылдьаллар.

Кыстатыам биир кыһалҕата — мөлтөх интэриниэт. 2023-24 сылларга улууска былаанноммыт оптоволокно ситимэ Кыстатыам диэки тиийбэт эбит. Туора турар уонна Эдьигээн нэһилиэгин утары Өлүөнэ өрүс олус киэҥник сытар. Бу туһунан СӨ Инновацияҕа министиэристибэтин бэрэстэбиитэлэ Петр Николаев тоҕо оннугун, ханнык атын ньымалары көрдүөххэ сөбүн сиһилии кэпсээтэ, быһаарда.

Кыстатыам ытык кырдьаҕаһа Дмитрий Егорович Семенов этиитин кэлбит дьоҥҥо махтал тыллартан саҕалаата: «Бырабыыталыстыба отчуотун илэ кэлэн ыытыыны икки сыл кэнниттэн сөргүтэн саҕалаабыккыт олус үчүгэй. Туох да диэбит иһин, бу курдук көрсөр быдан көдьүүстээх. Онон барҕа махтал!», — диэтэ.
Ону кытта бэйэтин тус кыһалҕатыттан киирбит уопсай толкуйун кытта үллэһиннэ: «Инбэлииттэр, кырдьаҕастар куоракка көрдөрүнэ барарбыт эрэйдээх. Биир сүрүн кыһалҕа, өр көрдөрө киирдэххэ түһэр сир суох. Онон тыа сириттэн тиийэр инбэлииттэргэ анаан туспа гостиница баара буоллар бэрт буолуо этэ», — диэтэ кини.

Кини санаатын истэн баран, бөлөҕү салайар Елена Волкова хоруйу биэрдэ. «Интэриэһинэй этии, ол гынан баран тута быһаарыллыбат дьыала, үп тыырыытыгар итинник туттууга ыстатыйа суох. Ол эрээри, Дмитрий Егорович, биһиги уустук балаһыанньа үөскээтэҕинэ хас биирдии кыһалҕалаахха көмөлөһө, быһаара сатыыбыт. Мунньах кэнниттэн кэпсэтиэхпит», — диэн эттэ.

Мунньах күүрээннээхтик ааста, ыйытыы элбэх. Сорохторо тута быһаарылыннылар, сорохторо үлэҕэ ылыллан боротокуолга киирдилэр. Мунньах кэнниттэн саалаҕа тута дьону биирдиилээн көрсөн кэпсэтии саҕаланна, дьон бырабыыталыстыба бэрэстэбиитэллэрин кытта бэйэлэрин кыһалҕаларын ырыттылар, ыйытыыларыгар хоруйдары ыллылар.