Кыстыкка бэлэммит

Өрөспүүбүлүкэ 36 оройуона кыһыҥҥы кыстыкка киирэргэ бэлэм. Уопсайа 1160 хочуолунай үлэтин саҕалаата. Бу туһунан  Олох-дьаһах, хомунаалынай хаһаайыстыба уонна энэргиэтикэ министиэристибэтигэр иһитиннэрдилэр.

Өрөмүөн түмүктэнэн эрэр

Ол курдук, билигин 100% сылааһынан доруобуйа харыс­табылын тэрилтэлэрэ уонна олорор дьиэлэр хааччылыннылар. Оттон атын социаль­най суолта­лаах эбийиэктэри ыллахха – 99%. Министиэристибэҕэ бэлиэтээбиттэринэн, ититии ситимэ Булуҥ оройуонун Арктическай гимназиятыгар уонна Дьокуускай куорат “Улыбка” оҕо уһуйааныгар киирэ илик. Оҕолор билиҥҥитэ туспа сылаас дьиэлэргэ үөрэнэ сылдьаллар. Бу эбийиэктэргэ сылааһы биэрэр хочуолунайдар алдьамматахтар, ол эрэн, хапытаалынай өрөмүөннэрэ хойу­таан үлэҕэ киирбэккэ тураллар. Эбэйиэктэргэ үлэ хаамыытын түргэтэтэн, бу күннэргэ сы­­лааһы биэрэргэ соруйбуттар.

Ресурсанан хааччыйар тэрилтэрэр отчуоттаабыттарынан, быйылгы өрөмүөн үлэтин бырагыраамата 99% толороллубут. Саха сиригэр барыта 1160  хочуолунайтан 1154-дэ өрөмүөннэммит, 4009 км ититэр ситимтэн 4006-та бэлэмнэммит. Итиэннэ 1654 км уу, 677 км канализация ситимнэрэ толору үлэҕэ киирбиттэр. Оттон 887 км уот ситимиттэн 761-рэ бэлэм.

Бүгүҥҥү күҥҥэ хочуолунай уонна уот ситимин өрөмүөннэрин бытархай үлэлэрэ Нерюнгри, Алдан, Өймөкөөн уонна Өлүөхүмэ оройуоннарыгар ыытыллаллар. Бу үлэлэр дьиэлэри сылааһынан хааччыйыыга мэһэйдээбэттэр.

Эбийиэктэр бэлэмнэрин туһунан пааспардар

Балаҕан ыйын 21 күнүгэр социальнай эбийиэктэргэ уонна олорор дьиэ пуондатыгар сылааһы биэрии боппуруостарын Саха сирин бырабыыталыстыбатын хамыыһы­йата көрдө. Мунньахха СӨ Бырабыыталыстыбатын бэ­­рэссэдээтэлин бастакы солбу­йааччы Дмитрий Садовников, олохтоох дьон сылаас тиэрдиллиитин туһунан ыйытыылары биир кэлим дьуһуурунай диспиэччэрскэй сулууспаҕа ыытыахтарын сөп диэн эттэ. Киирбит ыйытыылары хому­наалынай сулууспалар уһаппакка-кэҥэппэккэ быһааралларыгар соруйда.

“Билигин араас ханаалларынан, ол иһигэр биир кэлим диспиэччэрскэй сулуус­па нөҥүө киирбит үҥсүү ­этиилэр үлэҕэ ылылыннылар. Онон, өскөтүн сылаас кии­­риитин кытары сибээстээх боппуруостар баар буоллахтарына, сайаапкаларгытын ыытыҥ. Болҕомтото суох хаалыа суоҕа”, – диэтэ Дмитрий Садовников.

Ыйытыылары ханна биэрэбит

Өрөспүүбүлүкэҕэ эбийиэк­тэр кыстыкка бэлэмнэрин туһунан пааспардары туттарыы үлэтэ салҕанар. Докумуоннар Ростехнадзор ыйыытыгар-кэрдиитигэр сөп түбэспэт буоллахтарына, саҥаттан оҥоһуллаллар. Ол курдук, ититэр ­эниэргийэни туһанааччыларга бу үлэ балаҕан ыйын 15 күнүгэр түмүктэммитэ. Оттон ититэр уонна теплосетевой тэрил­тэлэргэ алтынньы 1 күнүгэр диэри, муниципальнай тэриллиилэргэ алтынньы 15 күнүгэр диэри болдьохтор олохтоннулар.

Саха сиригэр сылааһы биэрии балаҕан ыйын бастакы күннэригэр саҕаламмыта, ол да буоллар, сорох кыбартыыраларга батарыайалар тымныы тураллар диэн иһитиннэриилэр кии­рэллэр. Маннык түгэҥҥэ ханна эрийэн билсиэххэ сөбүн туһунан СӨ Тутууга уонна олорор дьиэҕэ-уокка судаарыстыбаннай хонтуруоллуур управлениетыгар быһаардылар.

Бастатан туран, дьиэҕэ сылаас суох буоллаҕына, сала­йар хампаанньаҕа эбэтэр ТСЖ (товарищество собственников жилья) этиэххэ наада. Оччоҕуна кинилэр сылааһы холбуурга тиэхиньиичэскэй үлэни ыытыахтаахтар.

Тэрилтэ салайааччытын солбуйаачы Павел Корнилов бэ­лиэтээбитинэн, ититии ситимин толоруу уонна дьиэлэр икки ардыларынааҕы ситими бэрээдэктээһин үлэтэ 4 күҥҥэ диэри ыытыллыан сөп. Бу үлэ теплогенерирующай ыстаансыйа күүһүттэн тутулуктаах.

Биир саамай киэҥник тарҕаммыт кыһалҕа – батарыайаларга салгын хаайтарыыта буолар. Маннык түгэн таҕыстаҕына эмиэ салайар хампаанньаҕа этэҕит.

Итиэннэ эрдэ суруйбуппут курдук, муниципальнай тэриллии биир кэлим дьуһуурунай диспиэччэрскэй сулууспатыгар эбэтэр оройуон дьаһалтатыгар биллэрэҕит.