Кытай тимир көлөлөрө “атаакалыыллар”

Үс сылтан бэттэх Арассыыйа ырыынагын кытай тимир көлөлөрө “атаакалаан” эрэллэр.

Ырытан көрдөххө, ааспыт 2024 сылга Арассыыйаҕа кытай массыыналарын атыыта 50% үрдээбит. Арай олохтоох оҥорон таһаарыыттан “Лада” эрэ тулуктаспыт.

Быйылгы хартыына хайдах эбитий? 2025 сыл бастакы кыбаарталыгар кытай массыыналарын атыыта 25% түспүт. Ол эрээри, Кытайга 2025 сыл кулун тутардааҕы туругунан, барыта 2,47 мөл. тимир көлө оҥоһуллан атыыламмыт, бу 2024 сыллааҕар
10,4% үрдүк. Маннык отчуоту Cһina Association of Automotive Manufacturers (CAAM) хампаанньа оҥорбут. Ордук BҮD диэн маркалаах тимир көлө оҥоһуллан күүскэ атыыламмыт.

Кытайга былаан быһыытынан быйыл 30 мөл. кэриҥэ массыына атыыланыахтаах. Манна, биллэн турар, японскай, германскай тимир көлөлөр эмиэ хабыллаллар.

Икки сылтан бэттэх Дьокуускай куорат ырыынагар кытай массыыналара атыыланыылара биллэрдик элбээтэ. Ол курдук, киин куораппыт уулуссаларынан аатырар-сураҕырар Хавал уонна Танк сүүрэ сылдьалларын үгүстүк көрөр буоллубут. Эспиэртэр этэллэринэн, өссө элбиэх кэриҥнээх. Оннук буолар кыахтаах, чугаспыт сыттаҕа. Тимир суолунан төһө баҕарар аҕалар кыах баар. Владивостоктан японскай тимир көлөлөрү аҕалан атыылааччылар Кытайга тустаах ырыынагы билэ-көрө тиийтэлээн эрэллэрэ иһиллэр. Бу күннэргэ онно ырыынагы билсэ сылдьар атыылааччы социальнай ситимигэр дьэ араас тимир көлөнү көрдөрдө. Үгүстэрин солуоннарын иһэ киһи хараҕа халтарыйыах курдук. Ол курдук, тимир көлө инньэ барыта килэйэн-халайан экран, монитор арааһа: олох сөмөлүөт иһин курдук. Ол эрээри, биһиги тыйыс кыһыммытыгар хайдахтара эбитэ буолла диэн ыйытыы турар. Чэ ону кэм-кэрдии көрдөрөн иһиэҕэ.