Кытайга дьаарбаҥкаҕа аҕыс сүүстэн тахса табаар арааһын көрдөрүүгэ туруордулар

«Арассыыйаҕа оҥоһуллубут» бэстибээл-дьаарбаҥка Харбиҥҥа норуоттар икки ардыларынааҕы эргиэн-экэнэмиичэскэй дьаарбаҥката иитинэн ыытылла турар.

Бу туһунан Арассыыйатааҕы экспорт киинигэр иһитиннэрэллэр. Тэрээһиҥҥэ Арассыыйа 50 эрэгийиэниттэн 100-тэн тахса оҥорон таһаарааччы кыттар. Маныаха 800-тэн тахса табаар арааһа көрдөрүүгэ туруоруллубут. Бэлиэтээн эттэххэ, СӨ экспорты өйүүр киинэ Саха сирин түөрт хампаанньатын бородууксуйатын көрүүгэ илдьибит.

Арассыыйа оҥорон таһаарааччылара аһы-үөлү, утахтары, косметиканы, киэргэллэри, сувенирдары, уо.д.а. көрдөрөр. Дьон-сэргэ сөбүлээбит табаарын миэстэтигэр тута атыылаһыан эбэтэр КНР сиригэр-уотугар маҕаһыыннарга атыылаһыан сөп. Ол курдук, РЭЦ генеральнай дириэктэрэ Вероника Никишина иһитиннэрбитинэн, КНР номнуо Арассыыйа табаара атыыланар 11 маҕаһыына баар буолбут.

Харбиҥҥа дьаарбаҥка ыам ыйын 17-21 күннэригэр ыытыллар. Соруга — Арассыыйа уонна КНР икки ардыларыгар эргиэн-экэнэмиичэскэй хардарыта сибээһи күүһүрдүү, инновационнай, научнай-тэхиньиичэскэй эйгэҕэ бииргэ үлэлээһини кэҥэтии, уо.д.а.

Сиһилии: https://www.sakha.gov.ru/news/4813 манна киирэн ааҕыаххытын сөп.

СӨ Ил Дарханын уонна Бырабыыталыстыбатын пресс-сулууспата