Кытайга кыыс ыал буоларыгар 35 сааһыттан эдэр буоллаҕына төлөбүр ананар буолла

Кытайга Шаньси провинциятын Люйлян куоратыгар бырабыыталыстыбата ыал буолар кыыс 35 сааһын туола илик буоллаҕына 1,5 тыһыынча юань (20 тыһ. кэриҥэ солкуобай) төлөбүр аныырын туһунан иһитиннэрдэ.

Бу саҥа өйөбүл эрэгийиэҥҥэ дьиэ кэргэн уонна оҕо төрөөһүнүн ахсаанын аҕыйатыыны кытта сибээстээх: 2005 сылга 1 тыһ. киһиэхэ ортотунан 13,61 оҕо төрөөбүт, оттон 2023 сылга — 6,6.

Куорат дьаһалтатыгар быһаарбыттарынан, бу өйөбүл эдэр ыал эрдэ оҕолоноругар туһуланар. Бу түбэлтэҕэ кинилэр эбии төлөбүрдэри ылар кыахтаахтар: 2 тыһыынча кэриҥэ юань (27 тыһ. солк. кэриҥэ) — бастакы оҕоҕо, 5 тыһыынча кэриҥэ юань (68 тыһ. солк. кэриҥэ) иккис уонна 8 тыһыынча юань (108 тыһ. солкуобай) — үһүс оҕоҕо.

«Пэнпай» таһаарыы иһитиннэриитинэн, бу кэмҥэ маннык өйөбүллэри икки Кытай куората олохтообут уонна эдэр ыалга 1 тыһыынча юань (13 тыһ. солк.) матырыйаалынай көмөнү аныыллар.

Биллэрин курдук, билигин Кытайга демографическай балаһыанньа уустугурар — дьахтар уонна эр киһи ахсаана улаханнык араастыыр уонна аҕам саастаахтар ахсаана элбии турар. Бу биир төрүөтүнэн 1970-с сыллар бүтүүлэригэр «Биир дьиэ кэргэн-биир оҕо» диэн бэлиитикэ киирбитинэн ааҕыллар, оттон дэриэбинэлэргэ эдэр ийэ бастакы оҕото кыыс буоллаҕына икки оҕолонуон сөптөөҕө.