Кытайга Саха сирин үрдүк үөрэҕэ кыттыылаах университет аһыллыаҕа

Саха сирин Хотугулуу-Илиҥҥи федеральнай университета уонна Чаньчуньскай научнай-тиэхиньиичэскэй институт Кытай Норуодунай Өрөспүүбүлүкэтигэр  Саха-Цзилиньскай технологическай университеты арыйарга холбоһуктаах бырайыактарын олоххо киллэрэллэр. Устудьуоннары 2024-2025 үөрэх дьылыгар хайыы үйэ ылаллара былааннанарын туһунан ХИФУ пресс-сулууспатыгар иһитиннэрдилэр диэн ТАСС суруйар. 

«Саха-Цзилиньскай технологическай университет Цзилинь Яньбянскай Корейскай автономнай провинциятын Лунцзин куоратыгар аһыллыаҕа. Үөрэх инженерияҕа, мэдиссиинэҕэ, экэниэмикэҕэ, менеджмеҥҥэ уо.д.а. бакалавриат систиэмэтинэн ыытыллыаҕа. Бастакы биэс сыллаах түһүмэххэ 6 тыһыынчаҕа тиийэ, иккис түһүмэххэ 12 тыһыынча устудьуону үөрэтэр былааннанар. Инникитин устудьуоннар ахсааннара 15 тыһыынчаҕа тиийиэҕэ”, — диэн пресс-сулууспаҕа иһитиннэрдилэр.

ХИФУ ректора Анатолий Николаев быһаарбытынан, бу үрдүк үөрэх кыһалара быйыл доҕордуу сыһыан олохтоммута уон сылын бэлиэтиэхтэрэ.

«Биллэн турар, коронавирус улахан мэһэйдэри үөскэппитэ. Түмсүүлээх буолуу уонна бэйэ-бэйэҕэ итэҕэйсии эрэ көмөтүнэн биһиги маннык суолталаах түгэҥҥэ тиийэн кэллибит. Бу биһиэхэ олус долгутуулаах уонна үөрүүлээх. Сыл бүтүөр диэри ылыллыбыт былааннар олоххо киириэхтэригэр эрэнэбит”, — диэтэ Анатолий Николаев.

Бырайыагы олоххо киллэрии түмүктүүр түһүмэҕэр кэллэ. Үлэни бэлэмниир кэмитиэт бу сыл бүтүүтэ КНР Үөрэххэ министиэристибэтин аккредитациятын ылар уонна 2024-2025 үөрэх дьылыгар устудьуоннары үөрэтэр былааннаах.