Хаартыска: PxHere саайтан
Арассыыйа тимир суоллара (АТС) Кытайы уонна КНДР-ы кытта пассажирдары тиэйиини сөргүтэллэр. Бу туһунан АТС пресс-сулууспата иһитиннэрэр.
Кытайы уонна КНДР-ы кытта пассажирдар сырыылара 2020 сыллаахха тохтотуллубута. Билигин, 2024-2027 сыллардааҕы айан графига олохтоммутунан, Суйфэньхэ – Гродеково маршрутунан 402/401 №-дээх норуоттар икки ардыларынааҕы пуойастар уонна Туманган – Хасан хайысхатынан 645/646 №-дээх норуоттар икки ардыларынааҕы пуойастар сырыылара сөргүтүлүннэ.
Кытай уонна Арассыыйа икки ардыгар 402/401 №-дээх пуойас 2024 сыл ахсынньы 15 күнүттэн күннэтэ айанныаҕа. Суйфэньхэ куораттан олохтоох бириэмэнэн 10:00 чааска, оттон Гродековоттан олохтоох бириэмэнэн 17:43 чааска тахсыаҕа.
КНДР уонна Арассыыйа икки ардыларынааҕы 645/646 нүөмэрдээх пуойас ахсынньы 16 күнүттэн нэдиэлэҕэ үстэ — бэнидиэнньиккэ, сэрэдэҕэ уонна бээтинсэҕэ айанныаҕа. Пуойас Туманган ыстаансыйаттан олохтоох бириэмэнэн 12:00 ч., оттон Хасан ыстаансыйаттан олохтоох бириэмэнэн 15:30 ч. Айаҥҥа турунуоҕа.
Бу иннинэ ахсынньы 15 күнүгэр Арассыыйа тимир суоллара үс сылга биирдэ – 2027 сыл ахсынньытыгар диэри – пассажирскай пуойастар саҥа араспысаанньаларын киллэрэллэрэ биллибитэ. Уопсайа, 2027 сыл ахсынньы 12 күнүгэр диэри 627 паара ыраах айанныыр пуойастар (“ол диэки” уонна “төттөрү” састааптар) сылдьаллара былааннанар, ол билиҥҥи графигы кытта тэҥнээтэххэ, 13 пааранан элбэх. Түргэн, үрдүк ускуорастаах пуойастар ахсааннара 405-тэн 410 паараҕа диэри улаатыаҕа. Арассыыйа тимир суоллара бэлиэтээбитинэн, баларга билиэт атыыта эрдэттэн аһылынна: дойду иһинээҕи пуойастарга – 90-120 суукка инниттэн, норуоттар икки ардыларынааҕы пуойастарга – 45-60 суукка инниттэн.
Маны кытта тэҥҥэ Арассыыйа тимир суоллара Саҥа дьыллааҕы айаннарга анал сыананы олохтообутун биллэрдэ. Ол курдук, ахсынньы 31 күнүгэр 19:00 чаастан уонна тохсунньу 1 күнүгэр күнү быһа Москва уонна Санкт-Петербург икки ардыгар сылдьар “Сапсаҥҥа” эконом-кылаастаах билиэттэр сыана аҥарыгар атыыланыахтара. Быйыл Саҥа дьыллааҕы билиэт сыаната 2025 солк. быһылынна. Маны таһынан, Арассыыйа тимир суоллара 2024 сыл ахсынньы 28 күнүттэн 2025 сыл тохсунньу 8 күнүгэр диэри Москва уонна Санкт-Петербург икки ардыларыгар эбии пуойастары ыыталларын биллэрдэ. Чуолаан, 764 уонна 766 №-дээх пуойастар киин куораттан 11:30 уонна 11:40 чаастан айанныахтара. Оттон Санкт-Петербургтан күн аайы 11:00 уонна 11:10 чаастан 763 уонна 765 нүөмэрдээх пуойастар эбии рейстэрэ киириэҕэ.
Бүгүҥҥүттэн Бүтүн Арассыйатааҕы “Сыл учуутала-2025” күөн күрэс өрөспүүбүлүкэтээҕи түһүмэҕэ саҕаланна. Быйыл өрөспүүбүлүкэ араас улуустарыттан барыта…
Дойду култуурунай эйгэтигэр бэлиэ түгэн буолла – 1965 сыллаахха композитор Александра Пахмутова, поэттар Сергей Гребенников…
Саха сирин сүүмэрдэммит хамаандатын дзюдоистката Надежда Татарченко Череповец куоракка дьахталларга ыытыллыбыт Арассыыйа Куубагын үрүҥ көмүс…
Быйыл Социальнай пуонда Саха сиринээҕи салаата 1804 өрөспүүбүлүкэ олохтооҕун уонна кинилэри арыаллыыр дьону санаторнай-курортнай эмтэниигэ…
Саха сирин сүүмэрдэммит хамаандатын чилиэнэ Николай Яковлев буулдьанан ытыыга Арассыыйа успуордун маастара буолла. Бу туһунан…
Алдан икки олохтооҕо тимир суол тэрилтэтиттэн 12 көлүөһэ диискэтин уоран, биэс сылга диэри көҥүллэрэ быһыллыан…