Кыталык айанын норуот күүһүнэн кэтээн көрүөхтэрэ

Бу Кыһыл кинигэҕэ киирбит сэдэх көтөрдөрү үөрэтиигэ, харыстыырга өрөспүүбүлүкэ хас биирдии олохтооҕо бэйэтин кылаатын киллэриэн сөп.

Кыталык ханан, хайдах айанныырын билэргэ норуот кэтээн көрүүтүн киллэрэрин туһунан «Кыталык айана» бырайыак биллэрдэ.

Ону хайдах оҥорору, атын майгынныыр көтөрдөртөн туох атыннаахтарын СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтигэр быһааран биэрдилэр.

Саха сиригэр кыталык маассабай көтөн кэлиитэ ыам ыйыгар саҕаланар. Кыталыгы көрбүтүҥ туһунан иһитиннэриини өрөспүүбүлүкэ бары улуустарыттан хомуйуохтара. Онно анал анкетаны толоруоххун наада. Итиннэ маннык пууннар бааллар: күнэ-дьыла, суукка ханнык кэмигэр көрбүтүҥ, көрбүт сириҥ (ол сир чуолкайдык ыйыллыахтаах), төһө элбэхтэрэ, кэтээн көрөөччүттэн төһө ыраах сылдьаллара. Ону кытта хаартыскаҕа түһэриэххэ эбэтэр видеоҕа устуохха наада.

«Өскөтө анкетаны кыайан толорбот буоллаххытына, хайа баҕарар табыгастаах ньыманан бэйэҕит кэтээн көрүүлэргитин суруйуоххутун сөп. Сүрүнэ – кыталыктар тустарынан иһитиннэрии киириэхтээх, оччоҕо эһиги дааннайдаргытын кэтээн көрүүгэ туһаныахпыт», — диэн тэрийээччилэр бэлиэтииллэр.

Норуот кэтээн көрүүтэ учуонайдарга  кыталык ахсаанын чуолкайдыырга, айаннарын суолун билэргэ  көмөлөһүөҕэ.

“Бу улахан суолталаах бырайыакка Саха сирин олохтоохторун барытын кыттыһалларыгар ыҥырабыт. Эһиги кэтээн көрүүгүт өрөспүүбүлүкэбит ураты айылҕатын харыстааһыҥҥа уонна кыталык курдук сэдэх көтөрү көмүскүүргэ сыаналаммат кылаатынан буолуоҕа”, — диэн министиэристибэҕэ тоһоҕолоон бэлиэтээтилэр.

Кыталыгы көрдөххүтүнэ, толорор анкетаҕыт бу сигэнэн. киирдэххитинэ баар.