«Кыталыктар» Москваттан кыайыы көтөллөөх иһэллэр

Бүгүн Москваттан үөрүүлээх сонун кэллэ. РФ, СӨ култууратын үтүөлээх үлэһитэ Василий Винокуров салайар «Кыталык» народнай үҥкүү ансаамбыла «Москва куубага» диэн норуоттар икки ардыларынааҕы күрэскэ «Норуот үҥкүүтэ» номинацияҕа гран-при үрдүк аатын ылла. Онон Василий Павловичка итиитинэ эрийэ сырыттыбыт.

“Кыталык” ансаамбыл бу күннэргэ дойдубут киин куоратыгар Саха сирин күннэригэр саха култууратын, ускуустубатын билиһиннэрэ сылдьар. Ахсынньы 9 күнүгэр Чайковскай аатынан кэнсиэртиир саалаҕа Арассыыйа норуоттарын култуурунай нэһилиэстибэлэрин сылын түмүктүүр тэрээһиҥҥэ кытыннылар. Манна Пятницкай аатынан академическай народнай хор, Н.Надеждина “Березка” академическай үҥкүү ансаамбыла, «Вайнах», «Нальмэс» академическай үҥкүү ансаамбыллара, уо.д.а. биллэр-көстөр кэлэктииптэр кыттыылаах улахан кэнсиэр буолбута. Бу тэрээһиннэри Арассыыйатааҕы норуот айымньытын дьиэтэ тэрийбит.

Ахсынньы 12 күнүгэр Надежда Бабкина “Русская песня” тыйаатырыгар “Вышитая карта России” тэрээһиҥҥэ кыттан, саха маастардарын өйөөбүттэрэ. Сарсыныгар “Бэс Чагда” сонотуоруйга доруобуйаларын чөлүгэр түһэрэ, эмтэнэ сытар уолаттарга, анал байыаннай дьайыы кыттыылаахтарыгар баран, үҥкүүлэрин көрдөрөн, санааларын көтөҕөн кэлбиттэрэ. Василий Павлович этэринэн, Москваҕа барыахтарын инниттэн бу уолаттарга күүс-көмө буолар туһунан эрдэттэн  былааннаммыттар эбит.

Маны тэҥэ, ахсынньы 14 күнүгэр муосчут уустар быыстапкаларын аһыллыытыгар “Оһуор” үҥкүүнү көрдөрбүттэр.

— 1982 сыллаахха Москваҕа САССР култууратын, ускуустубатын күннэригэр 48 киһилээх, 24 пааралаах “Оһуор” үҥкүүнү көрдөрөн турабыт. Оттон билигин 16 пааралаах үҥкүүнү туруордубут. Манна барыта 35 буолан кэлбиппит: 9-12 саастаах оҕолортон саҕалаан, устудьуоннар, ыччаттар бааллар. Бачча ыраах кэлбиччэ, туох кыалларынан, элбэх тэрээһиҥҥэ кытынныбыт, саха үҥкүүтүн көрдөрдүбүт. Бүгүн Дьокуускайбытыгар көтөбүт, онон сыалбытын ситиһэн, үөрэн-көтөн, айаннаан эрэбит, — диэн Василий Винокуров кэпсээтэ.

Ахсынньы 14-16 күннэригэр «Измайлово» кэнсиэртиир саалаҕа буолбут “Москва куубага” куонкуруска 100-тэн тахса кэлэктиип кыттыбыт. Кыттааччылары үрдүк квалификациялаах хореографтар, идэтийбит үҥкүүһүттэр, үтүөлээх артыыстар сыаналаабыттар. «Кыталыктар» гран-при буолбуттарын тэҥэ, икки анал аакка 1-кы, 2-с истиэпэннээх лауреаттарынан буоллулар. Итиэннэ аны саас Волгоградка «Весна Победы» диэн норуоттар икки ардыларынааҕы күрэскэ ыҥырыыны туттулар.

“Кыталык” народнай үҥкүү ансаамбылыгар 5-65 саастаах, 400-тэн тахса киһи дьарыктанар. Ол курдук, саастаах дьоҥҥо вальс, ону тэҥэ, спортивнай бальнай үҥкүүлэр, фитнес бөлөхтөрө бааллар. Мэҥэ Хаҥаласка эрэ үлэлииллэр буолбатах, Дьокуускайга Хотугулуу-Илиҥҥи федеральнай университет иһинэн филиал, “Кыталык-ХИФУ” ансаамбыл тэриллибит. Манна араас улуустартан сылдьар устудьуоннар дьарыктаналлар.

— СӨ спортивнай бальнай үҥкүүлэр федерацияларын уонна художественнай гимнастика федерациятын салайааччы Людмила Николаеваны кытары бииргэ үлэлэһэбит, художественнай гимнастиканы сайыннарар бырайыагын өйүүбүт. Саха оҕолоро олус талааннаахтар, ону аан дойду таһымыгар көрдөрүөхтээхпит дии саныыбын. Людмила Валерьевна – мин үөрэнээччим, спорвтинай бальнай үҥкүүлэри уонна художественнай гимнастиканы сайыннарыы дьыалатын бэйэтин илиитигэр ылбыта наһаа үчүгэй, бииргэ үлэлэһэрбититтэн үөрэбин, — диэн Василий Павлович түмүктээтэ.