Күтүөт буолаары сылдьар уоллара кыһыл көмүс киэргэллэрин уорбут

ИДьМ «Якутское» 4-с №-дээх полиция отделыгар Дьокуускай куорат олохтооҕо дьахтар кыбартыыратын иһиттэн кыһыл көмүс киэргэллэрэ сүппүтүн туһунан сайабылыанньа суруйбут. Сүтүк барыта 200 тыһыынчаттан тахса солкуобайга тэҥнэспит.

Суһал-ирдиир үлэлэр кэннилэриттэн быһаарбыттарынан, кыһыл көмүс киэргэллэри уорууга 23 саастаах эр киһи — бу ыал кыыстарын кэргэн ылаары сылдьар уол кыттыгастааҕа биллибит.

Уол тулаайах эбит, кыыс дьоно киниэхэ тута үтүөтүк сыһыаннаспыттар, дьиэлэригэр киллэрбиттэр.

Биллибитинэн, уол кыбартыыра күлүүһүн дубликат оҥотторон, ийэ кылына суоҕуна дьиэҕэ киирэн киэргэллэри уорбут. Кини көмүһү туттарбыт, ол харчытын бэйэтин наадаларыгар бараабыт, күүлэйдээбит, арыгы атыыласпыт.

«Уоруу» диэн ыстатыйанан холуобунай дьыала тэрилиннэ диэн ИДьМ пресс-сулууспата суруйар.