Кытыл уулуссалар — дьон тардыһар, сынньанар сирдэрэ

2024 сылга Саха сирин  киин куората олохтоохторго уонна ыалдьыттарга икки улахан, тупсаҕай уопсастыбаннай сири тупсаран оҥордо. Олимпийскай чөмпүйүөн Роман Дмитриев аатынан кытыл уулусса 202-с түөлбэҕэ  аһыллыбыта уонна Сайсары күөл тулатынааҕы кытыл тупсарыллан оҥоһулунна.

Бырайыактар ​​Арассыыйа бэрэсидьиэнэ Владимир Путин бигэргэппит Дьокуускай сайдыытын маастар-былаанын  уонна «Олоххо инфраструктура» национальнай бырайыак «Куорат табыгастаах эйгэтин оҥоруу» федеральнай бырайыагын чэрчитинэн олоххо киирдилэр.

Роман Дмитриев аатынан кытыл уулусса 2018 сыллаахха саҕаламмыт үлэ түмүгэ буолар. Губинскай уокурукка архитектурнай куонкурус кэнниттэн, архитектор Анку Гасич бырайыага талыллыбыта, кэлин NOMADO бюрота тупсарбыта. Билигин кытыл уулусса 1,14 килэмиэтир уһуннаах уонна аныгылыы сатыы уонна бэлисипиэтинэн сылдьар суоллардаах, сынньанар сирдээх, тренажердаах, култуурунай тэрээһиннэргэ ыытыллар сыаналаах, табыгастаах массыына туруорар сирдээх. Наталья Христофорова уонна LETO ЯКУТИЯ бэстибээл волонтердара оҥорбут 300 миэтэрэлээх спортивнай тиэмэлээх мурал уруһуйдара бу кытыл уулусса киэргэлэ буолла.

Дьокуускай сүрүн архитектора Семён Сергеев бу кытыл уулусса Губинскай уокурук уонна куорат сайдыытын туоһута буолла диэн этэр.

«Роман Дмитриев аатынан кытыл уулусса, Сайсары күөл кытылын курдук, олоххо киирэргэ былааннаммыта ыраатта, 2017 уонна 2018 сыллартан саҕалаан. Губинскай уокурук бэйэтин архитектурнай күрэҕин ыытан, кыайыылааҕы талан, бу бырайыагы олоххо киллэрии саҕаламмыта. Үлэ сезона уопсайынан ситиһиилээхтик ааста: олохтоохтор сынньанан,  оонньоон, сайыны атаардылар, спордунан дьарыктаннылар. Кыайыы болуоссата эмиэ саҥардылынна,  сэрии бэтэрээннэригэр уонна Арассыыйа Дьоруойа Андрей Григорьевка анаан оҥоһуллубут мураллар, саҥа газоннар  оҥоһулуннулар», — диэн эттэ.

Ордук болҕомто 2025 сылга  пляһы тупсарыыга уурулунна. Дьокуускай куорат техническэй хааччыйыыга сулууспатын дириэктэрин эбээһинэһин толорооччу Егор Степанов сөтүөлүүр  сезон быһылаана суох ааспытын бэлиэтээтэ, олохтоохтор саҥардыллыбыт сири үрдүктүк сыаналаатылар.

«Биһиги пляжнай сезоммут этэҥҥэ ааста. Быйыл туох да түбэлтэ суох диэххэ сөп. Саамай сүрүнэ, дьон пляж уларыйбытыттан үөрэллэр. Биһиги элбэх үчүгэй сыанабылы ылбыппыт. Үлэ киирэр аантан саҕаламмыта: массыына туруорар сир уонна саҥа тротуардар оҥоһуллубуттара. Бэлисипиэттиир суол, уопсастыбаннай туалет, оҕо дьиэтэ, уонна ас-үөл туочукалара эбиллибиттэрэ. Инникитин пляж 203-с түөлбэ диэки кэҥиирэ былааннанар. Кытыл уулуссаны  саҥардыы, ол иһигэр пляһы, бэрэсидьиэн Владимир Путин көҕүлээбит  федеральнай бырайыагын чэрчитинэн ыытыллыбыта», — диэн Степанов тоһоҕолоон бэлиэтиир.

Губинскай уокурук салайааччыта Андрей Михайлов эмиэ олохтоохтор бэйэлэрэ кыттыылара улахан суолталааҕын бэлиэтээтэ, кинилэр тупсарыыга көхтөөхтүк кытыннылар.

«Роман Дмитриев аатынан кытыл уулуссаҕа олохтоохтору кытта сатыы дьон сылдьар сирин тупсарыыга үлэлээтибит, бэлисипиэт суолларын оҥордубут,  ыскамыайкалары уонна сырдык сценаны туруордубут. Массыынаны туруорар миэстэлэр эбиллибиттэр. Олохтоохтор йоганан уонна гимнастиканан дьарыктанар, сынньанар сирдэрин  эмиэ оҥордубут. Салгыы тупсарыы былааннанар, бастатан туран, көҕөрдүү өттүнэн», — диэтэ Андрей Михайлов.

Уокурук олохтоохторо кытыл уулусса сынньанар сир эрэ буолбакка, чөл олоҕу тутуһар киин буолбутун бэлиэтииллэр. Губинскай уоукурук спортивнай инструктора Мария Васильева санаатын үллэһиннэ.

«Сарсыарда аайы кэргэмминээн манна кэлэн дьарыктанабыт: сүүрэбит, хаамабыт, эрчиллэбит. Элбэх киһи кэлэр: ыаллар, эдэр дьон. Кинилэр хаалыктаах хаамыыга дьарыктаналлар. Эдэр дьон үксүн сүүрэллэр. Холобур, сарсыарда 6-7 чааска  тахсарбытыгар, күн аайы 100-чэкэ киһи баар буолар. Олохтоохтор бары кытыл уулуссаны олус сөбүлүүллэр. Бу сиргэ тупсарыы ыытыллыбыта олус үчүгэй. Барыгытын ыҥырабын: спордунан дьарыктаныҥ, мастары, тупсаҕай сирдэри харыстааҥ», — диэтэ Мария Васильева.

Биир бэлиэ түгэнинэн Сайсары күөл кытыытын тупсарыы буолла. Бу бырайыак туспа историялаах: өссө 2017 сыллаахха Дьокуускай Арассыыйа тутууга министиэристибэтин Бүтүн Арассыыйатааҕы куонкуруһугар кыттыбыта уонна «Strelka» консалтинговай хампаанньа босхо бырайыагын сүүйбүтэ.

2022 сыллаахха «Куорат табыгастаах эйгэтин оҥоруу» бырагыраама чэрчитинэн, рейтиннээх куоластааһын ыытыллыбыта, онно бу бырайыак кыайбыта. 20 000 кэриҥэ куорат олохтоохторо өйөөбүттэрэ. 2023 сылтан Сэргэлээх шоссетын диэки тупсарыы саҕаламмыта, онтон 2024 сыллаахха бүтүн күөлү эргийэр сир тупсарыллыбыта. Бүгүҥҥү күҥҥэ сатыы, сүүрэр, бэлисипиэтинэн айанныыр төгүрүк трасса оҥоһулунна. Ийэ болуоссата оонньуур былаһааккалаах, кафелаах саҥардылынна, «Триумф» комплекс аттыгар спортивнай былаһаакка, эбии сынньанар сирдэр, газоннар оҥоһулуннулар.

Куорат кылаабынай архитектора олохтоохтор көхтөөхтүк туһаналларын тоһоҕолоото.

Роман Дмитриев аатынан кытыл уулусса уонна Сайсары күөл кытыла — 2024 сылга тупсарылыннылар. 2023 сылтан 2025 сылга диэри уопсайа 264,4 млрд. солк. суумалаах 37 эбийиэги тутуу уонна саҥардыы ыытыллан,  Дьокуускай маастар-былааныгар киирдилэр. 2024 сылга алта бырайыак түмүктэннэ: Ленин болуоссатын тупсарыы, Роман Дмитриев аатынан кытыл уулусса, Сайсары күөл кытыла, Дьокуускайдааҕы ДСК собуотун саҥардыы, Нерюнгритээҕи Киин оройуоннааҕы балыыһа икки блогун саҥардыы.

Сиһилии аах: https://www.sakha.gov.ru/news/12340