Кытыы нэһилиэктэргэ болҕомто уурулларын туруорсаллар

Чэриктэй нэһилиэгэ Уус Алдан улууһун ыраах сытар нэһилиэктэриттэн биирдэстэрэ буолар. Ситэриилээх былаас отчуоттуур мунньаҕа оскуолаҕа ыытылынна.

Бырабыыталыстыба былырыыҥҥы сыллааҕы үлэтин билиһиннэрии кэнниттэн ыйытыылар саҕаланнылар.

Урукку сыллардааҕы отчуоттарга нэһилиэнньэ туруорсар кыһалҕаларыттан Мыла үрэҕи туоруур күргэ тутуллубут .
2018 сыллаахха умайбыт КСК дьиэтин тутууга туох хамсааһын барыай диэн ыйытыыга, «Үтүө дьыала» дирекцията, Тутуу министиэристибэтэ эбии 1 млрд 300 мөл. солк. көрөр түгэннэригэр, дьоҕус эбийиэктэр тутуллар кыахтаналлар диэн эттилэр. Оттон 2014 сыллаахха тутуллубут таас уһуйаан, хомойуох иһин, өрөмүөннэнэр да кыаҕыттан тахсыбыт. Онон оскуоланы кытта дьукаахтаһан олорон эриҥ, ол кэннэ модульнай конструкциянан дьоҕус эбийиэк тутуллуон сөп диэн сүбэлээтилэр.

Чэриктэй кырдьаҕас олохтооҕо Иван Свешников тыа сирин нэһилиэктэрэ ититиигэ 100% холбоннохторуна, ыччат тыа сириттэн барыа суох этэ диэтэ. Билигин Чэриктэйгэ 240 киһи хаалбыт.
Маны таһынан уот ситимин СИП проводка саҥардан тардыы барыахтаах. Итиннэ былаан быһыытынан «Якутскэнерго» 2026 с. кэлэн үлэлиэхтээх эбит. Биллэн турар, сэлээркэ, бэнсиин сыаната, арыыга оттуу барарга баарса наадата, фекалканы тоҕор сир, о.д.а кэккэ кыһалҕалар таарылыннылар. Өйдөөн көрдөххө, дьон олоҕун таһыма үрдээн истэҕин аайы, ону сэргэстэһэр кыһалҕалар тахсан иһэллэрэ көстөр.