Кыыһы өлөрөн — 9,5 сылга хаайыыга

Дьааҥы улууһун Баатаҕай сэлиэнньэтин 34 саастаах киһитэ сууттанна. Кинини кыыһы өлөрүүгэ буруйдааҕынан билинэн, 9,5 сылга көҥүлүн быһарга бириигэбэрдээтилэр диэн СӨ Силиэстийэлиир кэмитиэтэ иһитиннэрэр диэн СИА суруйар.

Бу киһи эрдэ сууттана сылдьыбыт эбит. 2022 сыл ыам ыйыгар бииргэ аһыы олорон 29 саастаах билэр кыыһын түөскэ быһаҕынан анньыбыт. Кыыс тута тыына быстыбыт.

Силиэстийэ кэмигэр бу киһи буруйун билиммэтэх, туох буолбутун араастаан быһаарбыт. Ол эрээри, кини кыыһы соруйан өлөрбүтүн дакаастаабыттар.

Суут бу киһини буруйдааҕынан билинэн, 9 сыл 6 ыйга кытаанах эрэсиимнээх холуонньаҕа көҥүлүн быһарга уурда.