«Күүһүлээтэ» диэн сымыйа донуоһу суруйбут

Дьааҥы улууһугар «бу киһи миигин күүһүлээтэ» диэн сымыйанан донуос суруйбут дьахтары ыстарааптыахтара. Дьааҥы улууһун борокуратуурата бу буруйдааһыны көтүрбэтэ.

2024 сыл балаҕан ыйыгар бу дьахтар сымыйа донуос иһин накаастабыл баарын билэ-билэ, күүһүлээтилэр диэн полицияҕа сайабылыанньа суруйбут.

Бэрэбиэркэ кэнниттэн биллибитинэн, сайабылыанньа сымыйа буолан тахсыбыт. Дьахтар билэр киһитин сымыйанан буруйдаабыт, тоҕо диэтэххэ, кинилэр сыһыаннарын бэйэтин кэргэниттэн кистээри гыммыт эбит. Бүтэһигэр барыта биллэн тахсыбыт.

Суут бу дьахтарга 100 тыһыынча солкуобайдаах ыстараабы төлүүрүгэр уураахтаабыт. Бириигэбэр сокуоннай күүһүгэр киирэ илик диэн СӨ Борокуратуурата иһитиннэрэр.