Кыыһырсыы үйэни кылгатар

Киһи кыыһырыстаҕына истириэстиир, санаата түһэр. Онтон сылтаан мэйии үлэтэ бытаарар. Сүрэх, тымыр үлэтэ эмиэ мөлтүүр.

Сахаларга санаа баттыга диэн этии баар. Кыыһырсыбыт киһи маны барытын таһаҕас оҥостон илдьэ сылдьан атын туох да үчүгэйи санаабат буолар. Үөрүүлээх түгэннэр киһи үйэтин уһатар буоллахтарына, кыыһырсыы, хомойуу, хом санааһын барыта доруобуйаҕа улаханнык охсор. Ол эрээри кыыһырсымаары наар тулуйар эмиэ соттуктаах. Ол иһин аһаҕас кэпсэтии көмөлөһөр. Санааны сайа этии, күлүү, куустуһуу барыта доруобуйа туругун тупсарар. Сорох уйулҕа үлэһиттэрэ истириэстэн босхолонор туһугар кыыһырсар наада дииллэр. Оттон кыыһырсыбыт киһи төһө бэртик бэйэтин сананыай? Онон биһиэхэ, сахаларга дьону кытта кыыһырсыы, иирсии үчүгэйдик дьайбат. Ол кэриэтин улаханнык ыллаан, үҥкүүлээн, салгыҥҥа сылдьан киһи сэргэхсийэн куһаҕан эньиэргийэтин таһаарыахтаах.