Күүкэй олохтооҕо ойуурга сылдьарга аналлаах тиэхиньикэни бэйэтэ оҥорор

СӨ бырабыыталыстыбатын бэрэссэдээтэлэ Андрей Тарасенко салайааччылаах бөлөх  бэҕэһээ Сунтаар улууһугар үлэлээтэ. 

Күүкэйгэ ойуурга сылдьарга аналлаах баараҕай тиэхиньикэлэри  бэйэтэ айан-таҥан таһаарар Осип Андреев хаһаайыстыбатыгар сырыттылар. Туох-ханнык кыһалҕа баарын билсэн, күүс-өйөбүл буолалларын биллэрдилэр.

Күүкэй нэһилиэгин төрүт олохтооҕо Осип Андреевы биир дойдулаахтара аныгы көлүөнэ мындыр өйдөөх, уран тарбахтаах ууһун, рационализаторын быһыытынан билэллэр. Сорохтор сөбүлээн «Кулибин» диэн ааттыыллар. Кини төһө даҕаны анал тиэхиньиичэскэй идэтэ суох эрээри, сахалыы булугас өйүнэн-санаатынан салайтаран араас тиэхиньикэни айан таһааран, күүкэйдэри эрэ буолбакка, бүтүн өрөспүүбүлүкэ олохтоохторун сөхтөрөр.

Оробуочай бөлөх  маны таһынан  «Татыйыына» фирма бэкээринэтигэр сырытта. Манна араас суортаах килиэптэри сэргэ үүт, эт,  бурдук ас арааһын астыыллар. Быйыл тэрилтэ оҥорон таһаарар бородууксуйатын улаатыннарыыга үүт собуотун тутан саҕалаатылар диэн улуус дьаһалтатын пресс-сулууспата иһитиннэрдэ.

Оробуочай сырыы биир сүрүн соругунан тутуу эйгэтин кытта билсии буолла. Маныаха,  Сунтаарга пеноцеолит курдук ырыынакка бэйэтин хаачыстыбатын толору көрдөрбүт  тутуу матырыйаалын көрдүлэр.  Бырабыыталыстыба бэрэссэдээтэлэ бу хайысханы  сэргии истэн, логистическай каартаны оҥорон боппуруоһу ылсарга ыйда. Маны таһынан, быйыл элбэх уулаах дьыл туран, үгүс дьон оттуур ходуһалара ууга былдьанна. Холобур,  бордоҥнор сирбит 85 %-на ууга турар дииллэр. Онон быйылгыттан саҕалаан мелиорация үлэтин ыытыыга үлэ барыаҕа.