Кыыл Уолун айар үлэтигэр хомоҕой хоһооннор айылыннылар

ССРС Суруйааччыларын сойууһун чилиэнэ, РСФСР култууратын үтүөлээх үлэһитэ, Саха АССР ускуустубатын  үтүөлээх диэйэтэлэ, Сунтаар улууһун Бочуоттаах олохтооҕо, норуот ырыаһыта Сергей Зверев-Кыыл Уола төрөөбүтэ 125 сылыгар аналлаах ыһыахтар кэмнэригэр литература эйгэтигэр араас тэрээһин ыытылынна.

Олортон биирдэстэринэн Леонид Попов аатынан улуустааҕы Киин бибилэтиэкэ тэрийэн ыыппыт, Сергей Зверевкэ  туһуламмыт анабыл хоһоону айыы түмүктэрин Түбэй Дьаархан ыһыаҕын кэмигэр  таһаарыы буолла.

«Номох буолан умнуллубат – норуот тыыннаах тыла!» өрөспүүбүлүкэтээҕи кэтэхтэн күрэскэ Бүлүүттэн, Уус Алдантан, Орто Халыматтан, Ньурбаттан, Үөһээ Дьааҥыттан, Үөһээ Бүлүүттэн, Чурапчыттан, Дьокуускайтан, Кэбээйитттэн, Амматтан, Тааттаттан  уонна Сунтаар улуустарыттан  барыта 33 киһи кытынна.

Дьүүллүүр сүбэҕэ Саха сирин норуодунай суруйааччыта    Наталья Михалева-Сайа, суруйааччылар  Афанасий Гуринов-Арчылан,  Ангелина Шадринова-Суоһааны кэтэхтэн үлэлээтилэр.

Наталья Михалева-Сайа:

«Быйыл Сергей Зверев  “Номох буолан умнуллубат норуот тыыннаах тыла”  диэн этиитигэр ыытыллыбыт кэтэхтэн күрэскэ киирбит хоһооннор төрөөбүт тылга уонна улуу киһи айар үлэтигэр анаммыттар. Үөрүүлээҕэ диэн,  күрэс  өрөспүүбүлүкэ айар дьоҕурдаахтарын түмэ тардыбыт. Ол курдук, дьүүллүүр сүбэ  12 улуустан 33 киһи үлэтин  көрдө. Мин тус бэйэм киирбит айымньыларга Кыыл Уолун уонна саха тылын туһунан сонун этиилэри, тэҥнэбиллэри, уос номоҕор киириэх бэргэн хоһуйуулары көрдөөтүм. Онтон поэзия күүһэ уонна кэрэтэ киһи олоҕун, тугу оҥорбутун уобарастаан, дьүһүйэн, киһи сүрэҕин долгутар, санаатыгар хаалар курдук  холоон хоһуйан этии буоллаҕа эбээт. Кыттааччылар үксүлэрэ оһуохай тэтимигэр уйдаран суруйбуттара өйдөнөр. Сергей Афанасьевич  улахан айымньыларын оһуокайдыы ыллаан биэрэрин үөрэхтээхтэр сурукка-бичиккэ түһэрэн биэрбиттэрин билигин ааҕабыт”, — диэн санаатын тириэрдибит  уонна салгыы биирдиилээн хоһооннору ырытан,  хоһоон суруйар дьон махталын ылыан ылла.

Күрэс түмүгүнэн бастыҥ хоһоон ааптардарынан буоллулар:

«Хомоҕой тыллаах хоһоонньут» – Александр Амбросьев-Сайылык Уола, Сунтаар улууһа, Кириэстээх (3000 солк. харчынан бириис);

«Тыл алыбар ылларбыт» – Семен Винокуров, Орто Халыма, Налимскай (3000 солк. харчынан бириис);

«Удьуор тыл ойууһута» – Тимофей Шестаков-Чоххуруос, Ньурба улууһа (3000 солк. харчынан бириис);

1 үрдэл – Валентина Бурнашова, Уус Алдан улууһа, Кэптэни (15000 солк. харчынан бириис);

2 үрдэл– Вениамин Егоров-Айан Чакыр, Сунтаар улууһа, Арыылаах (7000 солк. харчынан бириис);
3 үрдэл – Мария Данилова-Күн Мичээрэ, Сунтаар улууһа, Түбэй (5000 солк. харчынан бириис).

   Маны таһынан, тэрийээччилэр эбии анал ааттары анаатылар:

«Эдэр хоһоонньут» –Дмитрий Протопопов-Ураты Уран Тыл, Таатта улууһа, Кыйы;

«Аҕа саастаах хоһоонньут» – Клара Тихонова, Сунтаар улууһа, Тойбохой;

«Төрүт тылы үйэтитээччи» – Иван Кондаков-Тимирхан, Бүлүү улууһа, Бөтүҥ.

Күрэһи тэрийээччилэр, ол иһигэр Л.А.Попов аатынан улуустааҕы Киин бибилэтиэкэ методическай-информационнай салаатын үлэһиттэрэ  Саргылаана Спиридонова уонна Алена Портнягина:

“Кыыл Уола саха омугун тапталын ылыан ылбыт, сырдык ыралаах, итии иэйиилээх, кэлэр кэскиллээх ырыалара, тойуктара үйэлэргэ тыыннаах буолуохтара, саха омук салгыы сайдыытыгар, айанын аартыгар алгыс буолан арыаллыахтара”, — диэн   күрэс  бары кыттааччыларыгар  тэрийээччилэр ааттарыттан истиҥник махтаннылар. Ону сэргэ  айар-суруйар дьоҕурдара сириэдийэ,  сайда турарыгар баҕа санааларын тириэртилэр.