«Күүлэй! От кэмэ» саҥа киинэ олунньуга тахсыаҕа

Олунньу 5 күнүгэр Саха сирин киинэ тыйаатырдарыгар «Сахафильм» хампаанньа «Күүлэй! От кэмэ» диэн дьиэ кэргэнинэн көрөр кэмиэдьийэтин премьерата буолуоҕа. Режиссер Валентин Макаров кэпсээбитинэн, киинэ нөҥүө кини төрөөбүт дойдутун кэрэтин көрдөрөр ыра санаата туолар.

Киинэ, кэмиэдьийэ буоларын үрдүнэн, илии үлэтинэн дьарыктанарга баҕаны үөскэтэр уонна былыр-былыргыттан үлэһит киһини сыаналыыр саха норуотун философиятын өйдүүргэ чугаһатар. Урут Валентин Макаров «Кэрэл», «Дьулуур: Мас-рестлинг» уонна «Мин аатым Таптал» диэн киинэлэри устубута.

Киинэ ис хоһоонунан, пицца таһааччы Ньургун олоҕун устата аҕатыгар туохха эрэ сыаналааҕын дакаастыан баҕарар. Соһуччу киниэхэ эргэ доҕоро, фитнес-блогер Саргыал кэлэн, дэриэбинэҕэ баран от охсооччулар турнирдарын устууга көмөлөһөргө көҕүлүүр, ол күрэх сүрүн бирииһэ – тыраахтар.

«Саха төрүт илиитин үлэтэ – үлэлиэҕиттэн толлубакка, бары ыарахаттары тулуйан бэйэтин бигэргэппит саха норуотун биир бэлиэ көстүүтэ. Былыр-былыргыттан үлэһит киһини өбүгэлэрбит үрдүктүк туталлара. «Күүлэй! От кэмэ» киинэ киһи тыа хаһаайыстыбатын үлэтин нөҥүө олоххо дьолу уонна сыалы хайдах булуон сөбүн көрдөрөр. Билигин дьон барыта дьоллоох уонна ситиһиилээх буолбатах, уонна мин санаабар, ол төрүөтэ, ордук эдэр ыччат, илии үлэтиттэн тэйбитигэр сытар. Бэйэм киинэбинэн дьоҥҥо үлэлиэн баҕаны уһугуннарыахпын, саха норуотун философиятын өйдөтүөхпүн, ону тэҥэ от үлэтигэр сылдьыбыт, ол романтикатын билбит дьоҥҥо ахтылҕаны таһаарыахпын баҕарабын», – диэн кэпсээтэ киинэ режиссера, сценариһа уонна продюсера Валентин Макаров.

Режиссер бэйэтэ Мэҥэ-Хаҥалас улууһун Майа сэлиэнньэтигэр төрөөн-үөскээн улааппыт. Киинэни кини 2023 сыл от ыйыгар ийэтин төрөөбүт дойдутугар, Суола сэлиэнньэтин таһыгар устубут. Билигин онно кини аймахтара олороллор.

«Мин өйдөбүлбэр дэриэбинэ – көҥүл уонна дойду бэлиэтэ. Ханна эрэ өр барар буоллахпына, дойдуҥ тугу кытта ситимнэнэрий диэн ыйыттахтарына, мин дэриэбинэни саныыбын. Суола өрүс үрдүк кытыллара олус кэрэлэр. Мин бу сирдэргэ улааппытым, эһэбэр, таайдарбар, эдьиийдэрбэр кэлэрим, от үлэтигэр сылдьарым, дэриэбинэнэн күүлэйдиирим. Бу кэрэ миэстэлэри киинэҕэ көрдөрүөхпүн өрүү баҕарарым, ол баҕам туолбутуттан олус дьоллоохпун», – диэн Валентин Макаров үллэһиннэ.

Ньургун сүрүн оруолун Дмитрий Баишев толордо. Ону таһынан киинэҕэ Степан Порядин, Илья Попов, Анатолий Кириллин, Иннокентий Луковцев, Саина Семенова, Сулустан Скрябин уонна Гаврил Спиридонов уһулуннулар.