Кыылга кырыктаах сыһыанынан тэриллибит холуобунай дьыалаҕа саҥа көрдөрүүлэр эбилиннилэр

РФ ИДьМ МУ “Дьокуускайдааҕы” 3-дээх полиция  отделын участковайдарын сулууспата иһитиннэрбитинэн, куоскаҕа кырыктаах сыһыан түмүгүнэн тэриллибит холуобунай дьыалаҕа эспэртиисэ түмүктэннэ, диэн иһитиннэрэр ИДьМ Саха сиринээҕи пресс-сулууспата.    

Санатан эттэххэ, 2024 сыл алтынньытыгар РФ ИДьМ МУ “Дьокуускайдааҕы”  3-дээх полиция отделын участковайыгар Борисовка түөлбэ олохтооҕуттан иһитиннэрии киирбитэ. Кыыс быраабы араҥаччылыыр уорган бэрэстэбиитэлигэр кини урут бииргэ олорбут киһитэ куосканы муҥнаабытын уонна ол дьайыытын видеоҕа устубутун эппит. Хомойуох иһин, куосканы кыайан быыһаабатахтар – бэтэринээр көмөтө да кыайбатах.

Бу чахчынан “Кыылга кырыктаах сыһыан” РФ ХК 245 ыст. 1 ч. холуобунай дьыала тэриллибитэ.

25 саастаах эр киһи ити дьыалаҕа мин туох да сыһыаным суох диэбит, ол эрээри полицейскай наадалаах дакаастабылы хомуйара кыаллыбыт. Бүгүн туох баар эспэртиисэ түмүктэннэ.

Силиэстийэ салҕанар.