Кыыллаахтан төрүттээх бэтэрээннэрбитин эҕэрдэлээтибит

Ыам ыйын 9 күнэ – дириҥ өйдөбүллээх ытык күн. Сүһүөхтээх бэйэбит сүгүрүйэн туран, Аҕа дойду уоттаах сэриитигэр дойдубутун өстөөхтөн босхолообут эһэлэрбитигэр, эбэлэрбитигэр, аҕаларбытыгар, ийэлэрбитигэр дириҥ махталбытын тириэрдэбит!

Биһиги, аныгы көлүөнэ дьоно, Аҕа дойду сэриитигэр Улуу Кыайыыны уһансыбыт бэтэрээннэрбитин холобур оҥостон үйэлэргэ хаалларар, устуоруйаны көлүөнэттэн көлүөнэҕэ тириэрдэр, ыччаты иитэр ытык иэстээхпит! Төһө да сыл, хонук аастын, умнуллубат күн! Сэрии хонуутугар охтубут буойуннарга үйэлэргэ албан аат!

Бу күннэргэ Өлүөхүмэ улууһун Кыыллаах Арыытыттан төрүттээх өрөспүүбүлүкэбит араас улуустарыгар уонна Дьокуускай куоракка олорор биир дойдулаахтарбыт «Сомоҕо» түмсүү аатыттан Улуу Кыайыы 80 сыллаах бырааһынньыгынан «Кыайыы күнэ» эҕэрдэ бэлэх-аахсыйаны тэрийэн күндү дьоммутун, кыайыыны уһансыбыт тыыл уонна үлэ бэтэрээннэрин эҕэрдэлээтибит:

Анна Афанасьевна Корниловаҕа, тыыл уонна үлэ бэтэрээнэ, Саха Өрөспүүбүлүкэтин үтүөлээх бырааһа, Саха Өрөспүүбүлүкэтин доруобуйатын харыстабылын туйгуна, Саха сирин бастакы эндокринолог бырааһа, Өлүөхүмэ улууһун бочуоттаах гражданина (92 саастаах); Парасковья Семеновна Григорьеваҕа (Тимофеева), тыыл уонна үлэ бэтэрээнэ, Аҕа дойду Улуу сэриитин бэтэрээнэ, педагогическай үлэ бэтэрээнэ, Кыыллаах нэһилиэгин бочуоттаах гражданина (96 саастаах); Валентина Игнатьевна Поповаҕа (Грязнухина), тыыл уонна үлэ бэтэрээнэ, Майа сэлиэнньэтин бочуоттаах олохтооҕо, Мэнэ-Хаҥалас улууһун Потребкооперациятын бэтэрээнэ (92 саастаах); Татьяна Афанасьевна Федороваҕа (Корнилова), тыыл уонна үлэ бэтэрээнэ, Аҕа дойду Улуу сэриитин бэтэрээнэ, ССРС доруобуйа харыстабылын туйгуна, дьоруой-ийэ (95 саастаах) өйдөбүнньүк бэлэхтэри уонна махтал суруктары туттардыбыт. Айылҕаттан көмүс куоластаах биир дойдулаахпыт Мария Васильева ырыа бэлэхтээбитин ытык кырдьаҕастарбыт сэргээн, сэҥээрэн иһиттилэр, үрдүк сыанабылы биэрдилэр.

Валентина Игнатьевна хоп курдук саҥалаах. Биһиги тиийэрбитигэр тэлэбиисэрин холбоон олороро: “Уһун күнү быһа тугу гыныамый, аралдьыйарым тэлэбиисэр” – диэн этэр. Уруккуну-хойуккуну күн бэҕэһээ курдук ахтан кэпсиир. “Уһун үйэлэнии кистэлэҥэ тугуй?” – диэн ыйытыыбытыгар, толкуйдуу барбакка – хамсаныы диэн этэр. Уонна эдэр сааһыгар  мас кэрдиитэ курдук кытаанах үлэҕэ сылдьыбытын ахтар. Кыыһа Наталья этэринэн, Валентина Игнатьевна кэрпит маһа Аммаҕа түөртэ эргийэн кэлбит саҕа усталаах эбит. Ол курдук күүстээх үлэ, хамсаныы үйэтин уһаппыт. Ол да иһин хамсаныы туһалаах диэн сүбэлиир.

Бүгүҥҥү ыраас халлааммыт, эйэлээх олохпут иһин эһиэхэ барҕа махтал буоллун! Улуу Кыайыы 80 сыла туолбут долгутуулаах кэрэ-бэлиэ күнүнэн сүһүөхтээх бэйэбит сүгүрүйэн туран ис сүрэхпититтэн эҕэрдэлиибит! Баҕарабыт чэгиэн доруобуйаны, уһун үйэни, сырдык халлааны, дьолу-соргуну! Ким да умнуллубат, туох да умнуллубат!

Түгэнинэн туһанан «Кыайыы күнэ» эҕэрдэ бэлэх-аахсыйаҕа кыттыбыт, өйөөбүт биир дойдулаахтарбытыгар махталбытын биллэрэбит.

Кыыллаах нэһилиэгин биир дойдулаахтарын  «Сомоҕо» түмсүү салайааччыта Надежда КОРНИЛОВА.