Кыыллаахтар “Тулаайах кыыс” киинэни устубуттар

Кыыллаахпыт нэһилиэгэр “Тулаайах кыыс” диэн саҥа киинэни оҥорон, олохтоох дьоммут көхтөөхтөрүн өссө төгүл көрдөрдүлэр.

Омос көрдөххө, киинэ көрөр боростуой курдугун иһин, сааскы, сайыҥҥы үлэ түбүгүн быыһыгар дьону хомуйан киинэ устар манан аҕай буолбатах. Элбэх бириэмэни эрэйэр. Ону ол диэбэккэ туруорааччы режиссер Раиса Лавернова дьону түмэн, ааҕааччыларым биһирэбилин ылбыт, долгуппут “Көйгө кыыс” сэһэмминэн киинэ оҥордулар. Сыанарыйын Мария Поскачина суруйбут. Ааҕааччыларым эрдэ киинэ буолуон сөптөөх сэһэн диэн элбэхтик суруйаллара. Бастаан бэйэ икки ардыгар холонон көрдөхпүт.

Бу киинэҕэ олохтоох дьоммут былыргы иһитигэр — хомуоһугар, этэрбэһигэр, талкытыгар тиийэ мунньан уура сылдьалларын көрдөрдүлэр. Сорох эдэр ыччат былыргы этэрбэс, талкы диэни умуннаҕа. Ону сөргүтэн көрдөрөллөрө кэрэхсэбиллээх.

Ю.А.Корнилова, Т.Н.Узорова, Ф.И.Узоров, С.А. Торговкин, В.В.Кузьмина, А.А.Банчина, Л.Л.Яковлева, Т.Л.Корнилова эрдэттэн сыаҥкаларга, тэттик киинэлэргэ уһуллубут, үөрүйэх дьон. Бу сырыыга саҥа ааттары бэлиэтии көрдүм. Сүрүн оруолга эдэр ыал Настя, Виталий Ивановтар бэркэ оонньоотулар.

В.П.Егомин, С.М.Захаров оруолларын хоп курдук толордулар. Баай кыргыттар оруолларын С.Н.Корнилова уонна П.Е.Максимова итэҕэтиилээхтик толордулар.

Раиса Еремеевна улугурбуту да уһугуннарыах, хомойбуту даҕаны үөрдүөх майгылаах, ылыннарыылаах тыллаах. Ол курдук, үлэ үөһүгэр сылдьар уолаттары киллэрэн оонньоппут — Никанор Максимов, Анатолий Кугасов, хата, оруолларга хоп курдук оонньообуттар.

“Көйгө кыыс” кэпсээним элбэх киһини долгуппута, ытаппыта. Тустаах хамнастаах артыыстар да буолбатар, үлэ үөһүгэр сылдьар дьон устубута нэһилиэк түмсүүлээҕин, олохтоохторо үлэһиттэрин көрдөрөр.

Бары үтүөнү кытта Родион Данилов-Ородьумаан.