Күн-дьыл туруга: Саха сирин үгүс өттүгэр күүстээх ардах түһүөҕэ

Бүгүн, ыам ыйын 16 күнүгэр, Саха сирин синоптикара Ленскэй, Өлүөхүмэ, Сунтаар, Ньурба, Үөһээ Бүлүү, Бүлүү улуустарыгар ардах, сорох сирдэринэн күүстээх ардах түһэрин, күнүс Ленскэй, Мииринэй, Өлүөхүмэ улуустарыгар арҕааттан сөкүүндэҕэ 17-22 м/с тиийэ түргэннээх тыаллаах буолара күүтүллэрин сылыктыыллар.
Ол курдук, Саха сирин үгүс өттүгэр кыралаан ардах, соҕуруулуу-арҕаа, арҕаа өттүгэр күүстээх, хоту, хотугулуу-арҕаа өттүгэр инчэҕэй хаар, күнүс соҕуруу, соҕуруулуу-арҕаа өттүгэр этиҥнээх ардах түһүөҕэ.
Өрөспүүбүлүкэҕэ сөкүүндэҕэ 9-14 м/с түргэннээх дохсун тыаллаах, арҕаа, соҕуруулуу-арҕаа, Арктика кытылынан 17-22 м/с түргэннээх тыалырыа.
Салгын температурата түүн +2+7°С, былыта суох буоллаҕына 0,-5°С, хоту -5-10°С, күнүс +13+18°С, соҕуруу, соҕуруулуу-илин +20+25°С, арҕаа өттүгэр +5+10°С, хоту -2,+3°С кыраадыс сылыйыа.
Дьокуускайга салгын температурата түүн 0,+2°С, күнүс +13+15°С. Түүн сөҥүүтэ суох, күн бүтэһигэр кыратык ардыаҕа, түүн арҕааттан, күнүс соҕуруулуу-илинтэн 3-8 м/с, сорох кэмҥэ 9-14 м/с түргэннээх тыаллаах.