Кыыс оҕону Казахстан кыраныыссатыгар хаалларбыттарынан үс үлэһит буруйданна

СӨ Борокуратууратыгар киирбит үҥсүүнэн, Сунтаар улууһун борокуратуурата кыыс оҕону Арассыыйа Федерациятын уонна Казахстан судаарыстыбаннай кыраныыссаларыгар хаалларыы чахчытын бэрэбиэркэлээтэ.

Бэрэбиэркэ түмүгүнэн, эбии үөрэхтээһин тэрилтэтин салайааччыта Астанаҕа аан дойдутааҕы күрэххэ айаҥҥа турунуон иннинэ, сокуон ирдэбилин кэһэн, сокуоннай сааһын ситэ илик оҕо Арассыыйа пааспардааҕын бэрэбиэркэлээбэтэх, сөптөөх докумуона суох оҕону айаҥҥа илдьэ барбыта быһаарыллыбыт.

Оҕо пааспарын суоҕун булбуттарын кэннэ, тэрилтэ салайааччыта кинини хонтуруоллуур-аһарар пууҥҥа Ис дьыала уорганнарын үлэһиттэрэ кэлиэхтэригэр диэри хаалларан кэбиспит. СӨ Борокуратууратын пресс-сулууспата иһитиннэрэринэн, Сунтаар улууһун борокуратуурата улуустааҕы үөрэх салалтатыгар уонна үөрэх тэрилтэтин аадырыһыгар этии киллэрбит. Ол түмүгүнэн, инникитин маннык кэһиилэри таһаарбат туһугар дьаһаллар ылыммыттар, үс киһи дисциплинарнай эппиэтинэскэ тардыллыбыт.  Борокуруор ирдэбилинэн, эбии үөрэхтээһин тэрилтэтиттэн оҕоҕо 107 тыһыынча солкуобай кээмэйдээх моральнай уонна материальнай хоромньу  төлөммүт.