Кыыс толкуйа суох быһыытын тохтоттулар

Балаҕан ыйын 12 күнүгэр 16 чаас саҕана 2 нүөмэрдээх полиция отделын дьуһуурунай чааһыгар биир кыыс болкуон түннүгэр олорорун уонна 10-с этээстэн ыстанаары гынарын  туһунан иһитиннэрии киирбитэ.

Лермонтов аатынан уулусса элбэх кыбартыыралаах дьиэтигэр полиция лейтенана Семен Заорщиков уонна ыстаарсай сержант Николай Тюменцев састааптаах патруль-пост сулууспата уонна суһал сулууспалар түргэнник тиийбиттэрэ.

Кинилэр үөскээбит балаһыанньаны үөрэтэн баран кыбартыыраҕа киирбиттэрэ, аан хатыыта суоҕа. Кинилэри 17 саастаах кыыс дьүөгэтэ  көрсүбүтэ уонна кыыс кими да бэйэтигэр чугаһаппатын туһунан эппитэ. Николай Тюменцев уонна быыһааччы кыыс тирэҕин сүтэрэн эрэрин таба көрөн, кыыһы тутан ылбыттара.

Полиция үлэһиттэрэ  уонна быыһааччылар сөптөөх уонна суһал дьайыыларын түмүгэр алдьархай тахсара бохсулунна. Быраабы араҥаччылааччылар кыыһы эмчиттэр биригээдэлэригэр туттардылар. Билигин сокуоннай сааһын ситэ илик кыыс олоҕор уонна доруобуйатыгар туох да суоһаабат.

СӨ ИДьМ пресс-сулууспата