Кыыстара харчыларын уордарбыт

Дьокуускайга биир ыалтан түөкүттэр 130 тыһыынча солкуобайы уорбуттар диэн ИДьМ пресс-сулууспата иһитиннэрэр. Ыал ийэтэ быһаарбытынан, 9 саастаах кыыстара Telegram ханаалга биир биллэр блогерга суруйтарбыт.

Бу киниэхэ суруйтардахха, 20 тыһыынча солкуобайы биэрэбит диэн биллэриини көрбүт уонна менеджергэ суруйбут. Ол сымыйа менеджер “харчы ыытарбытыгар баан каартатын дааннайдарын ыыт” диэн суруйбут.

Дьоно утуйа сыттахтарына, кыыс ийэтин каартатын ылбыт уонна дааннайдарын, төлөпүөҥҥэ кэлбит СМС-куодтары барытын суруйан ыыппыт. Онуоха түөкүттэр тута каартаҕа баар харчыны барытын суйдаан ылбыттар.

Полиция сэрэтэр:  интэриниэккэ баар, босхону, чэпчэки сыаналааҕы биэрэр-бэлэхтиир туһунан рекламаҕа итэҕэйимэҥ, ыйыллыбыт сигэлэри (ссылкалары) баттаамаҥ, төлөпүөҥҥэ саарбах сыһыарыылары туруорумаҥ. Атын эрэгийиэннэртэн кэлэр төлөпүөн нүөмэрдэриттэн эрийэллэрин ылымаҥ, эбэтэр, кэпсэтиини тута тохтотуҥ, онтон 102 уонна 112 нүөмэрдэргэ (полицияҕа) эрийиҥ.