«Күүстээх Ааппый-2025». Дьокуускайга мас тардыһыыга өрөспүүбүлүкэтээҕи турнир буолаары турар!

Кулун тутар 28 күнүгэр “Модун” спорткомплекска Харлампий Васильев кэриэһигэр 7-с өрөспүүбүлүкэтээҕи мас тардыһыы турнира – “Күүстээх Ааппый” буолаары турар.

Быйыл үгэскэ кубулуйбут күрэхтэһиилэр Улуу Кыайыы 80 уонна Үөһээ Дьааҥы улууһа төрүттэммитэ 95 сылларыгар ананан ыытыллаллар. Бу туһунан Sportyakutia.ru иһитиннэрэр.

Эр дьон аҕыс ыйааһыҥҥа: 60, 65, 70, 75, 80, 90, 105 уонна 105 киилэттэн үөһээҕэ диэри ким күүстээҕин быһаарсыахтара, оттон дьахталлар — 55 уонна 60 киилэҕэ диэри ыйааһыҥҥа. Бэтэрээн эр дьон 95 киилэҕэ диэри биир ыйааһыҥҥа киирсиэхтэрэ.

Өссө 75-кэ диэри уонна 75-тэн үөһэ ыйааһыннаах эр дьон икки ардыларыгар абсолютнай күөн көрсүүлэр буолуохтара. Абсолютнай чөмпүйүөннэргэ кыайыы иһин 50 000 солкуобайы уонна булт маҕаһыыныгар 20 000 солкуобайдаах сэртипикээттэри туттарыахтара. Ыйааһыннарыгар кыайбыт уонна бириискэ тиксибит дьоҥҥо: 1 миэстэ иһин – 15000 солк., 2-с миэстэ иһин — 10000 солк., 3-с миэстэ иһин — 7000 солк.