Күүстээх магнитнай буурҕа салҕанар

Сиргэ төрдүс күнүн күүстээх магнитнай буурҕа салҕанар. Бу туһунан РАН Космоһы чинчийэр институтун Күн астрономиятын лабораторията иһитиннэрэр.

Магнитнай шторм оптуорунньуктан саҕаланан баран, сороҕор намыраан, сороҕор күүһүрэн ыла-ыла, Сири «атаакалыыр». Буурҕа  G1-G3 баалтан намыраабат (муҥутуур баал G5). Бу маннык күүстээх буурҕа бэс ыйыттан түһэ илик этэ.

Учуонайдар бу магнитосфераны хачайдыыр күүс төрүөтэ Күн «тыала» олус түргэниттэн диэн быһаараллар — сөкүүндэҕэ 700-800 км түргэннээх эбит. Сороҕор 900 км/с тиийэ түргэтиир. Күҥҥэ эстиилэр тахса тураллар, төһө да үрдүк Х кылаастаах буолбаталлар (билиҥҥитэ М кылаастаахтар), ол эрээри, Сир диэки хайыспыт өттүгэр «корональнай» хайаҕас баар.

Ол иһин Сир хотугу эргимтэтигэр бу күннэргэ дьүкээбиллэр суһумнууллар. Бэҕэһээҥҥиттэн хоту эрэ буолбакка, Бүлүү бөлөх улуустарыгар улахан, чаҕылхай дьүкээбиллэр көстүбүттэрин социальнай ситимнэргэ тарҕаппыттара. Баҕар, киин улуустарга да көстүбүтэ буолуо эрээри, былыттаах этэ. Баҕар, бүгүн былыт дьайҕаран, Дьокуускайга да көстүөн сөп.

Күн астрономиятын лабораториятын учуонайдара балаһыанньа 1-2 суукканан көнүөҕэ диэн этэллэр. Ону да, эбии улахан эстии буолбатаҕына, плазма былыта кэлэн «саайыллыбатаҕына».

Бу күннэргэ бэйэҕитин харыстана, доруобуйаҕытын көрүнэ сылдьыҥ, аһара ноҕуруускаланымаҥ.