Күүстээхтэр, быһыйдар, сымсалар күрэхтэстилэр

Уус Алдан улууһугар II Байаҕантайга Аҕа дойдуну көмүскээччи күнүгэр үһүс сылын бэртээхэй күрэхтэһии ыытылынна.

Быйыл  «Айылгы» СК уонна оскуола успуорт саалатыгар ыытыллыбыт күөн күрэскэ Тиит Арыыттан төрүттээх биир дойдулаахтарбыт 7 көрүҥҥэ күрэхтэстилэр. Дуобакка, ханаат тардыһыытыгар, бильярдка, дартска, остуол тенниһигэр, сыал ытыытыгар уонна эстэпиэтэҕэ. Уопсайа уоннуу киһилээх биэс хамаанда илин-кэлин түһүстэ.

Түмүккэ кыайыылааҕынан Дьокуускайтан ох курдук оҥостон, кустук курдук куоһанан кэлбит хамаанда  тахсан, куобогы илдьэ бардылар. ОДьКХ хамаандата иккис бириистээх миэстэни ылан үөрүү-көтүү өрөгөйө буолла. Бороҕонтон бэлэмнэнэн кэлбит хамаандата үһүс миэстэҕэ тигистэ.

Нэһилиэк дьахталларын түмсүүлэрэ минньигэс астаах сандалыны тардан, бар дьоннорун күндүлээтилэр. Маны сэргэ, бэртээхэй быыстапка, эҕэрдэ кэнсиэр тэрээһин кыттыылаахтарын болҕомтолорун тарта. Тэрээһин үрдүк таһымнаахтык ыытылынна, бары кыттыбыт, көҕүлээбит, көмөлөспүт, өйөөбүт дьоҥҥо, тэрилтэлэргэ махтал тыллар ананнылар.

Мотрена Григорьева,

Тиит Арыы, Уус Алдан.