Лаачаан Уус саҥа остуол оонньуутун толкуйдаан оҥордо

Биһиги аттыбытыгар норуоттан тахсыбыт талааннаах дьон үгүс.

Кинилэри «Саха сирэ» хаһыат  “Сатабыл” рубрикатыгар анаан сырдатар. Амма улууһун Абаҕатыттан төрүттээх Александр Попов-Лаачаан Уус тирии атах таҥаһын тигэр буолуоҕуттан ыла, сакаас киниэхэ хамаҕатык киирэр.

Соторутааҕыта Лаачаан Уус тус ыҥырыытынан, аны, кини атын дьарыгын кытта билсэн кэллибит. Кыһыҥҥы кэмҥэ Александр Иванович атах таҥаһын оҥоруутунан дьарыктанар эбит буоллаҕына, сайыҥҥы кэмҥэ пластмасс бытыылканы уонна пеноплаһы кытта “эриһэр”. Тэлгэһэтигэр киирээккин кытта, Лаачаан  олбуорун устатын тухары кураанах 19 лиитэрэлээх иһэр уу бытыылката саһааннанан турарыгар хараҕыҥ быраҕыллар.

Бу Александр Иванович оҥоһуктарын матырыйаала. Лаачаан Уус  оҥорбут оҥоһуктара үгүс киһи болҕомтотун  тарпыттарын туһунан “Бэйэ дьыалатынан дьарыктанааччылар быыстапкаҕа күннээтилэр” диэн «Саха сирэ» саайтка ыам ыйыгар сырдаппытым. Онно «уу иһититтэн туох оҥоһук суоҕуй?» диэх курдук, араас тэрил бэйэ дьыалатынан дьарыктанааччылар быыстапкаларыгар хото турбут этэ. Ол курдук, Лаачаан иһэр уу бытыылкатыттан оҥорбут мас кыстыыр суумката, бөх тоҕор көлүөһэлээх дьиэтээҕи тэлиэгэ, сир астыыр иһит атыыга хамаҕатык барбыттара.

Оттон бу сырыыбытыгар Лаачаан Уус мастарыскыайыгар  бытыылкаттан лаампата («люстрата”), тэрилин мунньар иһитэ, быһата, илиитин уунна да, наадалааҕын барытын уу иһититтэн оҥорбут тэриллэриттэн булар.

Таһырдьа ардах уутун кырыыһаттан мунньарга эмиэ бэртээхэй тэрил оҥоһуллубут.

Маны таһынан сир астыыр иһити, бурдук уурар тэрили, быһата, күн талбытын оҥорор эбит.

Дьиэҕэ-уокка туттуллар тэрил үгүс киһи интэриэһин тардара чахчы.

Александр Иванович биһигини ыҥырбыт соругун маннык билиһиннэрдэ:

Кырдьык да, эһиил буолаары турар «Азия оҕолоро» оонньуулары көрсө бэртээхэй сонун остуол оонньуута баар буолбут.

60-с сыллардааҕы оҕолор кумааҕы оонньуурдарын үйэтитэн Лаачаан Уус  «Оҕо сааспыт ооньуурдара» диэн остуол оонньуутугар, кырдьык да, киһи ылларан туран оонньуур эбит!

Лаачаан Уус аны «Хомуур хапсаҕайа» диэн остуол оонньуутун айар былааннаах.

Александр Попов-Лаачаан Уус  остуол бастакы оонньуурун В.Г. Белинскэй аатынан Кыраайы үөрэтэр бибилэтиэкэҕэ анаан бу тэрилтэ үлэһитигэр Екатерина Поповаҕа туттарда.

Аны мантан инньэ Лаачаан Уус оҥорбут остуол оонньуута киэҥник тарҕанарыгар эрэллээхпит.

Лаачаан Уус сатабыллаах үлэтин-хамнаһын туһунан репортааһы «Саха сирэ» хаһыат бу чэппиэрдээҕи нүөмэригэр ааҕыҥ.