Лааҕырга суруйтарыы ыам ыйын 15 күнүттэн саҕаланар

Оҕо сайыҥҥы сынньалаҥын тэрийии боппуруоһунан төрөппүт аһаҕас мунньаҕа буолан ааста. Тэрийээччилэр иһитиннэрбиттэринэн ыам ыйын 15 күнүттэн лааҕырга суруйтарыы саҕаланар. Хайдах суруйтарабыт?

Үөрэх уонна билим миниистирин бастакы солбуйааччы Михаил Присяжнай иһитиннэрбитинэн, күн бүгүн өрөспүүбүлүкэҕэ 153 055 оҕо баар. Былырыын 46 бырыһыан оҕо сынньаммыт, доруобуйатын тупсарыммыт. “Быйыл оҕо 50 бырыһыанын хабар былааннаахпыт. 560 лааҕыр аһыллан үлэлиэҕэ. Итинтэн 434 – күнүскү, 48 — куорат таһынааҕы стационарнай, 44 – үлэ, сынньалаҥ, 34 – балаакканан” – диэн эттэ.

Байыаннай дьайыы кыттыылаахтарын оҕолоругар ураты болҕомто уурулларын ыйда. Бары улуустары, куорат уокуруктарын кытта сөбүлэһии  түһэрсиллибит, бу категориянан 1973 оҕо сынньанара былааннанар диэн иһитиннэрдэ.

“Бэс чагда” оҕо сынньалаҥын уонна доруобуйатын чэбдигирдэр киин дириэктэрэ Варвара Васильева нормативнай баазаҕа улахан уларыйыы киирбитин эттэ. “Оҕо сынньалаҥа чахчы сынньалаҥ уонна доруобуйатын чэбдигирдэрин туһугар биһиэхэ 87 лааҕыр ирдэнэр. Бу олус улахан сыыппара. Суукканы эргиччи үлэлиэх этилэр”, – диэн этэр.

Варвара Альбертовна иһитиннэрбитинэн, быйыл 560 лааҕырга барыта 57 тыһ. оҕону сынньатар былааннаахтар. “Реестр ыам ыйын 15 күнүттэн аһыллыаҕа. Өрөспүүбүлүкэҕэ ханнык лааҕырдар баалларын каартаҕа көрүөхпүт. Сыллата сайаапка биэрэр төрөппүттэр билэллэр”, – диэн эттэ.

Саха сириттэн барыта байыаннай дьайыы кыттыылааҕын 2733 оҕото сынньаныаҕа: 1973 оҕо — муниципалитеттан субсидиянан, 200 оҕо — “Кэскил”, “Бэс Чагда”, “Энергетик” судаарыстыбаннай лааҕырдарга, 560 оҕо — кубуотанан Приморскай кыраайга.

Быйылгыттан баһаатайдары бэлэмнээһиҥҥэ былааннаах күүстээх үлэ барарын эттэ. Ыам ыйын 26-27 күннэригэр “Бэс Чагда” кииҥҥэ лааҕырдарга баһаатайдыан баҕалаах дьоҥҥо үөрэтэр сэминээри ыыталларын биллэрэр.

Саҥа технологиялар институттарын бэрэстэбиитэлэ Дмитрий Данилов Судаарыстыбаннай өҥө порталын нөҥүө оҕону лааҕырга хайдах суруйтарыахха сөбүн туһунан кэпсээтэ. Хас биирдии төрөппүт ыам ыйын 15 күнүттэн сарсыарда 9:00 чаастан саҕалаан киириэн сөп. Оҕо сынньалаҥа диэн көрдөөн сайабалыанньатын ыытар. “Төрөппүт “Семья и дети” диэҥҥэ киирэн  оҕотун дааннайдарын эрдэттэн киллэрэн бэлэмнээн кэбиһиэн сөп. Сайабылыанньаны хас да оҕоҕо биэриэххэ сөп” – диэн быһаарда. Ону тэҥэ, хас даҕаны оҕолоох төрөппүттэр хастыы даҕаны лааҕырга сайаапканы тэҥинэн ыытыахтарын сөп эбит.

Өрөспүүбүлүкэҕэ биир киэҥник сэҥээриллэр “Бэс чагда” лааҕыр начаалынньыга Лена Григорьева иһитиннэрбитинэн, лааҕырга Судаарыстыбаннай өҥө порталынан да, тус бэйэлэрэ тиийэн даҕаны суруйтарыахтарын сөп эбит. “Бэс чагда”, “Кэскил”, “Энергетик” лааҕырдар аһыллыахтара. Симиэнэлэр ыам ыйын 30 күнүттэн атырдьах ыйын 31 күнүгэр диэри үлэлиэхтэрэ диэн эттэ.

Маннык докумуоннар ирдэнэллэр: миниистир аатыгар сайабылыанньа, төрөппүт пааспарын куопуйата, оҕо төрөөбүтүн туһунан сибэдиэтэлистибэтин эбэтэр пааспарын куопуйата, олорор сиртэн ыспыраапка (14 саастарыгар диэри оҕолорго), санаторнай-курортнай эмтэнии путевкатын ыларга 070у формалаах ыспыраапка, 076 формалаах санаторнай-курортнай каарта, сыстыганнаах ыарыы суоҕун туһунан ыспыраапка (сыстыганнаах ыарыы суоҕун туһунан, бодьоҕо 3 күн), быһыы ылбыттарын туһунан сэртипикээт куопуйата эбэтэр ыспыраапка (корь, манту, грипп булгуччулаах), мэдиссиинэ көмөтүгэр, тус дааннайдар, хаартыска, видео устары көҥүллүүр туһунан сөбүлэҥ, дуогабар. Бу докумуоннар оҕо лааҕырга киирэригэр булгуччу баар буолуохтаахтар.

“Ыам ыйын 26-27 күннэригэр “Бэс чагда” баазатыгар баһаатайдарга, устудьуоннарга үөрэтэр сэминээр ыытыахпыт. Ол иитинэн өрөспүүбүлүкэ бары лааҕырдарыгар баһаатайдар талыллыахтара. Сиһилии “Бэс чагда” официальнай саайтыгар, ТГ ханаалыгар көрүөхтэрин сөп”, – диэн этэр.

Онтон оҕону Саха сирин тас өттүгэр сынньатыы туһунан “Бэс чагда” оҕону сынньатар киин мэтэдииһэ, тустаах хайысханы сүрүннүүр Оксана Герасимова кэпсээтэ. “Үөрэх уонна билим министиэристибэтэ сыллата “Океан”, “Орленок”, “Смена” оҕо федеральнай кииннэрин уонна “Артек” норуоттар икки ардыларынааҕы киини кытта сөбүлэҥ түһэрсэр. Путевкалар интеллектуальнай уонна айар дьоҕур үрдүк таһымын көрдөрбүт талааннаах, айдарыылаах, успуорка уһулуччу көрдөрүүлээх, билим үлэтигэр ситиһиилээх оҕолору, уопсастыбаннай холбоһуктар лидердэрин өйүүр соруктаах көрүллэр.

Быйыл 2025 сылга оҕо федеральнай кииннэригэр — 524, “Океаҥҥа” — 274, “Орленокка” — 40, “Сменаҕа” — 51, “Артекка” — 159 кубуота көрүлүннэ” – диэн эттэ.

Оҕо федеральнай кииннэригэр сынньанарга путевка ыларга “Путевка” автоматизированнай информациннай систиэмэҕэ (АИС) бэлиэтэнэр ирдэнэр. Маныаха оҕо электроннай буочтата наада, оҕо тус кэбиэниэтигэр киирэр сигэ (ссылка) манна кэлэр эбит. Тус кэбиниэтигэр оҕо бэйэтин дааннайдарын барытын киллэрэр: аатын (толору), кылааһын, оскуолатын, төрөөбүтүн туһунан сибэдиэтэлэстибэтин (14 сааһын туолбут буоллаҕына пааспарын дааннайдарын), кэлиҥҥи 3 сыллаах ситиһиитин барытын угар. Итиэннэ бэйэтэ баҕарар симиэнэтигэр сайаапкатын ыытар.

Путевканы түҥэтии ситиһии эриэйтинэ төһө үрдүгүнэн көрөн (автоматически) барар эбит. Түмүгэ оҕо тус кэбиниэтигэр кэлэр.

Оҕо биир учетнай сурутууну (учетная запись) оҥостор. Иккиттэн элбэх түгэнигэр быраабыланы кэһиинэн ааҕыллан, заблокируйданар диэн иһитиннэрдэ.

Онтон “Океан” оҕо киинигэр сайаапка ыытарга төрөппүт бэйэтэ эмиэ тус кэбиниэт арынара булгуччулаах, оҕотун сайаапкатын бигэргэтэрэ ирдэнэрин мэтэдиис тоһоҕолоон ыйар.

Лааҕыр тиэмэтигэр аналлаах төрөппүт аһаҕас мунньаҕын видеотын сиһилии бу сигэнэн киирэн көрүҥ.