Лабыкта — «Атласовтар уһаайбалара» эрэстэрээн «визитката»

Бу күннэргэ «Кыһын Саха сириттэн саҕаланар» кыһыҥҥы туристическай бэстибээл чэрчитинэн «Саха сирин амтана» киин куорат эрэстэрээннэрин  гастрономическай  куонкурустара тохсус сылын ыытылла турар.

Биир нэдиэлэ устата Дьокуускай эрэстэрээннэрин ыалдьыттара, кырдьык да, Саха сирин амтанын билэр, амсайар кыахтаахтар.  Быйылгы куонкуруска саха национальной куукунатын уонна аҕыйах ахсааннаах норуоттар бүлүүдэлэрин аныгы көрүүнэн аҕыс эрэстэрээн билиһиннэриэҕэ Ол курдук,  «Атласовтар уһаайбалара», «Аврора», «Высота-160», «КРЫША», Kitchen, «Орто дойду», «Зеленый город» уонна  «Махтал» эрэстэрээннэр  Москваттан уонна дойду киин эрэгийиэннэриттэн кэлбит эспиэрдэр иннилэригэр саха аһын маанытын билиһиннэриэхтэрэ.

«Саха сирин амтана» гастрономическай бэстибээл «Атласовтар уһаайбалара» эрэстэрээҥҥэ аһылынна.

— Саха сирэ эрэгийиэн уонна дойду социальнай сайдыытыгар бэрт суолталаах тэрээһини  ыытар эбит.  Култуурунай нэһилиэстибэни сайыннарыы сылыгар тоҕус сыл устата ыытыллар тэрээһин үгэстийбитэ хайҕаллаах суол. Ас нөҥүө норуот үгэһин тарҕатыы — сонун уонна бэлиэ көстүү, — диэн  «Кулинардар национальной ассоциацияларын бырабылыанньатын чилиэнэ, WACS норуотта икки ардылрынааҕы кылаастаах суудьуйата Денис Перевоз санаатын тиэртэ.

«Саха аһын амтана» гастрономическай бэстибээл аһыллыытыгар СӨ Ресторатордарын ассоциациятын салайааччыта Татьяна Тымырова бу кэмҥэ үгэс быһыытынан киин куорат эрэстэрээннэрин үлэһиттэригэр  ахсынньы саҥата бырааһынньык кэриэтэ буоларын бэлиэтээтэ:

— Биһиги ресторатордарбыт саха аһыттан араас ураты дьикти минньигэс амтаннаах бүлүүдэлэри астаан амсаталлар. Быйылгы эспердэр олохторугар аан бастаан  аан дойдуга суох, Саха сиригэр  эрэ тымныыга оҥоһуллубут астары  амсайыахтара. Онон асчыттарбыт киһини соһутар дьиктилээхэй астарын кэлэн амсайыҥ диэн киин куорат олохтоохторун уонна ыалдьыттарын ыҥырабыт.

Аны дьэ, «Атласовтар уһаайбалара» эрэстэрээн куонкуруска кыттыбыт астарын билиһиннэриэх.

Саха ыала маанылаах аһын — саламааты  бастакынан ыалдьыттарыгар амсатар. Эрэстэрээн бренд-пуобара Николай Атласов бэлиэтээбитинэн, бу саламаат уратыта — манна бурдуктан ас иһиккэ сугуну таммалатан баран үрдүгэр саламаат кутан күндүлээтилэр. Саламаат бүлүүдэтин хоту дойду минньигэс моруоската киэргэтэр.

Иккис бүлүүдэ  — хара килиэп үрдүгэр сүөгэй соустаах ыыһаммыт хатыыс ягельброда.  Бутерброд диэнтэн тахсыбыт бүлүүдэ. Лабыкта — Николай Атласов сөбүлээн туттар үүнээйитэ. Туспа технологиянан хатарыллан тахсар, дьэ, ас амтаннааҕа!

Үһүс бүлүүдэ — убаһа этиттэн оҥоһуллубут салаат. Манна туох суоҕуй диэх курдук: лабыктаттан чипсы, сибиэһэй оҕуруот аһа уонна… уулаах отон. Дьикти минньигэс, киһи айаҕар ууллар салаат, доҕор!

Сылаас бүлүүдэ амтана эмиэ дьикти: «Далбары» диэн бренд-пуобар Николай Атласов эмиэ ааптарыскай бүлүүдэтэ. Улахан сылгы этин өр да өр буһарбыттара — сымнаҕаһа диибин диэн. Хортуоппуйу өрүү этэр эбит буоллаҕына, асчыт бу сырыыга перловай хааһыны масленок тэллэйи кытта буһарбыт. Манна хонуу луугун эппиттэр уонна сэлиэй соустаабыттар. Эриэккэс минньигэс ас амтана билигин да баар курдук…

Уонна, биллэн турар, Николай Атласов атырбыт «Уччуу» мороженайа. Манна лабыктата суох эмиэ табыллыбатах — отон сиробун кытта лабыкталаах карамель кэмпиэт кыырпаҕа — ураты амтаны уонна көстүүнү биэрэр.

Бу аһы барытын амсайан баран, гастрономическай бэстибээл бочуоттах ыалдьыта, «Арассыыйа гастрономическай каартата» бырайыагы төрүттээччитэ уонна салайааччыта,  Арассыыйаҕа ресторатордар уонна отельердар гастротуризмҥа федерацияларын  салайааччытын солбуйааччы Екатерина Шаповалова «Саха счирин амтана» олус киэҥ далааһыннаах, дириҥ ис хоһоонноох тэрээһин буоларын илэ көрөн, амсайан итэҕэйдибит. Мин санаабар, Арассыыйа хас биирдии эрэстэрээнэ саха аһын бүлүүдэтиттэн  бэйэтин менютугар киллэриэн, эбиэн сөп» диэн бэлиэтээтэ.

Ити курдук, минньигэс астарынан доҕуһуолланан, «Атласовтар уһаайбаларыгар» кэлбит  ыалдьыттар олус астынан тарҕастылар.