Лаппарыйа Уус өйдөбүнньүк бүүһэ Аллыҥаҕа турда

Зверев ансаамбылыгар 30 хомуһу охсон, таптайан биэрбит Лаппарыйа Уус бүүһэ Аллыҥаҕа турда диэн Сунтаар улууһун дьаһалтатын пресс-сулууспата иһитиннэрдэ.

Маһы ыллатар, көмүһү күлүмнэтэр, тимири таптайар, хомуһу хоҥкунатар Данилов Данил Алексеевич — Лаппарыйа Уус төрөөбүт, олорбут, уһаммыт тапталлаах дойдутугар Аллыҥаҕа өйдөбүнньүк бүүс турда. Истиҥ тэрээһиҥҥэ улуус депутаттарын Сэбиэтин бэрэссэдээтэлэ Ульяна Попова кыттыыны ылла, эҕэрдэтин эттэ.

Уран уус аатын-суолун үйэтитиигэ сиэннэрэ, хос сиэннэрэ уонна Аллыҥа дьаһалтата күүскэ үлэлээннэр боруонсанан кутуллубут бүүһү Кытайга оҥоттордулар. Ытык кырдьаҕас бэйэтинэн олорорун курдук сирэйин-хараҕын, моһуонун оруобуна майгынныыр гына нарылаабыттар. Манна кини сыдьааннара Дьокуускайтан тиийэ кэлэн бүүс аттыгар үйэлээх маһы олортулар.

Данил Алексеевич «Аҕа дойду Улуу сэриитин кэмигэр килбиэннээх үлэтин иһин» В.И.Ленин төрөөбүтэ 100 сыллаах мэтээлин хаһаайынынан буолар. Ону тэҥэ, кини  үлэ, тыыл бэтэрээнэ. Кини Сергей Зверев — Кыыл Уолун ансаамбылыгар Москва куоракка ыччат бэстибээлигэр баралларыгар 30 хомуһу оҥорон биэрбитэ.

Саха норуотун маастарыстыбатын, сатабылын, уранын көрдөрөр, туоһулуур үтүөкэннээх киһи олорон ааспыт олоҕор, мэлдьи дьон ытыктабылыгар сылдьыбыта, элбэх ыччаты тэнитэн дьоллоох олоҕу олорбута. Кини сиэннэрэ, хос сиэннэрэ республика араас  муннугунан тарҕанан үлэни-үөрэҕи өрө туппут дьон. Өбүгэлэрин туйаҕын хатаран илиилэригэр сатабыллаахтар, уран уустар. Кинилэртэн биирдэстэрэ түүлээҕинэн дьарыктанар иистэнньэҥ, саха сирин норуотун маастара Ньургууна Иванова. Бу күн нарылаан тикпит таҥастарын дьон көрүүтүгэр таһаарда.

@suntaar_ulus