«Ларионов ааҕыылара-2026» 500 оҕо кытынна

Майаҕа быйыл «Ларионов ааҕыыларыгар» өрөспүүбүлүкэ оскуолаларыттан 500 оҕо кытынна.

Бүгүн саха биллиилээх учуонайа, профессор Владимир Ларионов аатынан орто оскуолаҕа үөрэнээччилэр научнай-практическай кэмпириэнсийэлэрэ буолан ааста.

Барыта 1065 сайаапка үөрэнээччилэртэн, 118 сайаапка учууталлартан киирбит. Дойду 4 эрэгийиэниттэн баҕалаах оҕолор куйаар ситиминэн эмиэ кыттан, суолталаах тэрээһин Арассыыйатааҕы таһымнанна.

Владимир Ларионов Майа орто оскуолатын 1956 сыллаахха иккиһинэн кыһыл көмүс мэтээлинэн бүтэрбит. Бу оскуола икки академигы — Владимир Ларионовы уонна Михаил Лебедевы иитэн таһаарбыт. Оскуола Владимир Ларионов төрөөбүт күнүн көрсө сыл аайы кини аатынан дэкээдэ тэрийэн ыытар. Ол чэрчитинэн кыахтаах оҕолор өрөспүүбүлүкэ араас улуустарыттан кэлэн кыттыыны ылаллар. Бүгүн 500-чэкэ оҕо кэлэн 18 сиэксийэлээх кэмпириэнсийэҕэ кыттыыны ылла. Ол курдук, Амматтан, Чурапчыттан, Горнайтан, Мииринэйтэн, Уус Алдантан, Кэбээйиттэн, Үөһээ Бүлүүттэн, Ньурбаттан, биир тылынан, өрөспүүбүлүкэ бары муннугуттан кэлэн кыттыыны ыллылар. Аатырбыт учуонайга анаммыт дэкээдэ сарсын Ларионов баалынан түмүктэниэҕэ.

Елена Потоцкая хаартыскаларга түһэриитэ.