Лариса Долина кыбартыыра харчытын Лурьеҕа биэриэм диэн эрэннэрдэ

Арассыыйа норуотун артыыһа Лариса Долина кини кыбартыыратын атыыласпыт Полина Лурьеҕа 112 мөл. солк. төнүннэрэр санаалааҕын эттэ.

Ити туһунан ырыаһыт Бастакы ханаал “Пусть говорят” анал таһаарыытыгар эппитигэр сигэнэн ТАСС суруйар.

“Миигин түөкүттэр албыннаабыттарыгар Полина Лурье буруйа суох. Кини манна буруйа суох. Онон мин соҕотох быһаарыыны ылынным – кыбартыыра харчыны төнүннэрэр туһунан. Мин бэйэм иннибэр кырдьыктаах буолуохпун баҕарабын. Бу, суут быһаарыытыттан тутулуга суох соҕотох, сиэрдээх быһаарыныы” – диэн артыыс эппит.

Ону кытта, билигин киниэхэ бу суума суоҕун бэлиэтиир. “Бу уустук буолуо, тоҕо диэтэххэ, миэхэ ити харчы суох. Ол эрээри, мин кыаллары барытын оҥоруом” – диэн иһитиннэрбит. Түөкүттэр атыы кэнниттэн (сделка) харчыны киниттэн тута ыла охсубуттарын, онон илиитигэр кыбартыыраттан киирбит харчы суоҕун эппит.

Былырыын атырдьах ыйыгар Долина Украина сириттэн төлөпүөннүүр түөкүттэргэ киирэн биэрбитэ. Түөкүттэр муус устартан бэс ыйыгар диэри киниэхэ тиһигин быспакка сибээскэ тахсан ууруммут харчытын куттала суох счекка көһөрөрүгэр итэҕэппиттэр. Ол түмүгэр ырыаһыт уурунуу харчытын түөкүттэр хонтуруоллуур счеттарыгар ыыппыт, ону тэҥэ, бэйэтин кыбартыыратын атыылаабыт. Албыҥҥа киирэн биэрбитин өйдөөн полицияҕа тыллабыта. Бу туһунан ТАСС суруйар.