Хаартыска: "СахаПресс"
Алтынньы 29 күнүгэр улуу композитор Петр Чайковскай төрөөбүтэ 185 сылыгар анаммыт «Чайковский-фест» норуоттар икки ардыларынааҕы бэстибээл чэрчитинэн, «Лебединое озеро» балеты көрдөрдүлэр.
«Лебединое озеро» балеты Суорун Омоллоон аатынан Опера, балет тыйаатырыгар аан бастаан 1999 сыллаахха аатырбыт маэстро Юрий Григорович туруоруутунан, бастакы бэрэсидьиэн Михаил Николаев өйөбүлүнэн, көрдөрбүттэрэ. Испэктээк ситиһиилээхтик туруоруллан, саха балета өссө үрдүк таһымҥа тахсарыгар төһүү буолбута.
Бу сырыыга сүрүн оруоллары — Одеттаны Мариинскай тыйаатыр балерината, Ваганов аатынан норуоттар икки ардыларынааҕы куонкурус лауреата Мария Буланова, Башкирскай судаарыстыбаннай балет, опера тыйаатырын солиһа, Башкортостан норуодунай артыыһа Рустам Исхаков толордулар. Испэктээккэ Суорун Омоллоон аатынан Опера, балет тыйаатырын артыыстара, Аксения, Наталия Посельскайдар ааттарынан Дьокуускайдааҕы балет оскуолатын үөрэнээччилэрэ, устудьуоннара кытыннылар.
«Лебединое озеро» испэктээк икки дьайыылаах, түөрт хартыыналаах. Бу Петр Чайковскай суруйбут бастакы уонна аан дойдуга саамай аатырбыт балета буолар.
Ыраас таптал күүһэ, бэриниилээх буолуу, таҥнарыы, албын-көлдьүн, хараҥа күүстэри утары охсуһуу, дьолго талаһыы — барыта баар. Колдун Ротбарт Одетта принцессаны кэргэн ылыан баҕарбытын, кыыс аккаастаабытын кэннэ, кинини уонна дьүөгэлэрин кубаларга кубулутар. Кубалар кыыс ийэтин хараҕын уутуттан үөскээбит күөлгэ сылдьаллар. Бу күөлгэ принц Зигфрид кэлэн, түүн үөһүгэр биир куба кэрэчээн кыыска кубулуйарын көрөн, таптаан кэбиһэр. Кыыһы ким эрэ олус күүскэ таптаатаҕына, өлүөххэ диэри бэриниилээх буолуом диэн андаҕайдаҕына, куба төттөрү кыыска кубулуйан, ап-хомуһун сүтүөхтээх эбит.
Ол эрээри Ротбарт ону билэн, кыыһын Одиллияны ыытар. Одиллия үүт-үкчү Одетта курдук дьүһүннээх эбит, ону тапталлааҕым бу сылдьар диэн, Зигфрид андаҕарын Одиллияҕа этэн кэбиһэр… Дьэ, ыраас таптал тэпсиллэр, кыыс үйэтин тухары куба буолар дьылҕаланар…
Дьиктитэ диэн, «Лебединое озеро» төһөлөөх элбэхтэ көрдөрүллүбүтэ буолуой? Ол тухары икки түмүктээх эбит, туруорааччы-режиссер түмүк дьоллоох, эбэтэр сордоох буоларын бэйэтэ быһаарар эбит.
Балекка дьиҥ кэрэни кэрэхсээччилэр, үрдүк ускуустубаны сыаналааччылар кэлбиттэрэ көстөр. Хас биирдии дьайыыны дохсун ытыс тыаһынан, «Бис! Браво!» хаһыынан доҕуһуоллаатылар, түмүккэ артыыстары сүһүөхтэригэр туран, эҕэрдэлээтилэр. Дьэ, чахчы, күн аайы Мариинскай тыйаатыр, Москватааҕы Улахан тыйаатыр солистарын сыанаҕа көрбөккүн ээ. Маннык түгэннэри Дьокуускай олохтоохторугар бу күннэргэ «Чайковский-фест» бэлэхтээтэ.
«Чайковский-фест» бэстибээл Дьокуускайга 33 сыл буолан баран, эргилиннэ. Бэстибээл Арассыыйа Култуура үлэһиттэрин айар сойуустарын Санкт-Петербурдааҕы салаатын уонна Саха сиринээҕи Опера, балет тыйаатырын холбоһуктаах үлэлэринэн, Култуура көҕүлээһиннэрин өйүүр бэрэсидьиэн пуондатын көмөтүнэн ыытыллар.
Кини граҥҥа киирсиитэ бу бастакы сырыыта буолбатах. Ол курдук, СӨ Тыатын хаһаайыстыбатын уонна ас-үөл бэлиитикэтин…
“Уһук Илин сулуһа” (“Звезда Дальнего Востока”) сыллата ыытыллар уопсастыбаннай-дьыалабыай бириэмийэҕэ Уһук Илиҥҥэ уонна Арктикаҕа олоххо…
Дьүкээбил туһунан төһө билэҕитий? Дьүкээбил -- айылҕа дьикти уонна ураты көстүүтэ. Дьүкээбил биһиги планетабытыттан сүүстэн…
"Аҕа дойдуну көмүскээччилэр" пуонда филиала байыаннай дьайыы бэтэрээнэ Юлиан Смогайлов "Транснефть-Восток" бөдөҥ бырамыысыланнай хампаанньаҕа үлэҕэ…
Бу күннэргэ саамай кылгас, хараҥа, тымныы күннэр тураллар. Аҕыйах хонон баран, күммүт кутуйах хаамыытынан уһаан…
Ахсынньы 19 күнүгэр түүн Дьокуускай куоракка Ленин проспегар турар дьиэ биир кыбартыыратыгар уот турбут. Буруонан…