Лөгөйдөр байыаннай дьайыыга сылдьар байыастарга көмөлөһөллөр

Уус Алдан улууһун Лөгөй нэһилиэгин (Кэптэни) олохтоохторо байыаннай дьайыы саҕаланыаҕыттан саха буойуттарыгар араас көмөнү оҥороллор. Кыра оҕотуттан саҕалаан, ытык кырдьаҕаһыгар тиийэ бэйэлэрин кылааттарын киллэрсэллэр.

Бу күннэргэ Уус Алдан улууһун Кэптэни нэһилиэгин олохтоохторо байыаннай дьайыыга сылдьар саха буойуттарыгар үс дьааһык маскировкалыыр сиэккэни уонна 116 блиндаж чүмэчитин оҥорон Дьокуускай куоракка баар көмө пуунугар аҕалан туттардылар. Харысхал буолар сиэккэни 36 киһи, оттон байыастары сырдатар, сылытар аналлаах блиндаж чүмэчитин 30 киһи алгыстаах санааларын этэн, илиилэрин сылааһын иҥэрэн оҥордулар.

Күргүөмүнэн түһүнэн, миэтэрэнэн таҥастары кырыйыыга оскуола үөрэнээччилэрэ, үлэһиттэрэ, оҕо уһуйаанын үлэһиттэрэ, биирдиилээн олохтоохтор, чүмэчини оҥорууга эдэр хаһаайкалар түмсүүлэрэ кыттыста.

«Дьааһыгынан чүмэчини ис сүрэҕиттэн уунан, улаханнык көмөлөспүт Анатолий Семёновичка махтанабыт, дэриэбинэҕэ бу матырыйаал көстөрө уустук. Оттон дэриэбинэ иһигэр матырыйааллары таспыт сыыдам сырыылаах суоппардарбытыгар Петр Сысолятиҥҥа, Гаврил Олесовка, куоракка босхо илдьэн туттарбыт Юрий Петуховка барҕа махталбытын этэбит. Ыҥырыы таһаарбыт, иилээн-саҕалаан үтүө дьыаланы тэрийбит уонна онно кыттыспыт Лөгөй нэһилиэгин «Өбүгэ аһа», «Лөгөй оҕуруоччуттара», «Кэрэли», «Өҥнөөх палитра», «Ситим» түмсүүлэрин чилиэттэригэр махтанабыт. Инникитин да бииргэ сомоҕолоһон, түмсэн Кыайыы туһугар үлэлиэхпит!», — диэн бэтэрээн учуутал, волонтер Елизавета Аржакова кэпсээтэ.