Lemmon комета Сиртэн муҥутуур чугаһынан ааһыаҕа

 C/2025 A6 Lemmon комета алтынньы 21 күнүгэр Сиртэн муҥутуур чугаһынан ааһыаҕа диэн РНА Космос чинчийиитин уонна Күн-Сир физикатын институттарын Күн астрономиятын лабораториятыгар иһитиннэрдилэр. Бу туһунан «Российская газета» суруйар.

Биһигиттэн ырааҕа 89 мөлүйүөн эрэ километр буолуоҕа. Куйаар кээмэйинэн — бу улахана суох. Кометаны алтынньы бүтүөр диэри — сэтинньи бастакы күннэригэр диэри көрүөххэ сөп. Ол эрээри, учуонайдар сэрэтэллэринэн, кометаны көрөргө сыаната суох эрээри, сырдыкка үчүгэйдик түһэрэр фотоаппараттар эбэтэр судургу дьиэтээҕи телескоптар наада буолуохтара. Хайа да түгэҥҥэ, оптическай тэрили штатив көмөтүнэн хамсаппакка бигэтик туруоруохха наада.

C/2025 A6 Lemmon — биирдэ эрэ кэлэн ааһар комета. Бу кометаны 2025 сыл тохсунньу 3 күнүгэр Lemmon хайатын чинчийии кэмигэр оҥоһуллубут хаартыскалартан булбуттара. Ол аата, бу комета Күн таһыгар биирдэ эрэ кэлэр уонна бэйэтин орбитатынан салгыы көтөн, Күн систематыттан букатыннаахтык барар.

Кини орбитата 1350-ча сылга тэҥнэһэр. 2025 сыл сэтинньи 8 күнүгэр Күнтэн 79 мөл. км ыраахха, бэйэтин орбитатыгар Күҥҥэ саамай чугас ааһыаҕа. Бу кэнниттэн кини эргиирин кэмэ 1150-ча сылга диэри кылгыаҕа. Алтынньы 18 күнүнээҕи туругунан, комета көстөр уотун кээмэйэ 4,8-ка тэҥнэспит. Алтынньы 28 күнүттэн сэтинньи 3 күнүгэр диэри кометаны Соҕуруу полушариеҕа киэһэтин көрүөххэ сөп.