Лена Иванова: «Волонтердарбыт көмөҕө кэлэ охсоллоро хайҕаллаах»

Өлөөн улууһун баһылыга Лена Степановна Иванова иһитиннэрбитинэн, быстах хомуур биллэриллээтин кытта оройуон дьаһалтата Арассыыйа Бэрэсидьиэнин, Ил Дархан Ыйаахтарыгар олоҕуран тутатына үлэни ыытан саҕалаабыта. Билиҥҥи туругунан Өлөөн оройуонуттан анал байыаннай эпэрээссийэҕэ 18 киһи кытта сылдьар: быстах хомуурга ыҥырыллыбыт — 10, тус баҕаларынан – 6, хантараагынан — 2. Биир ыччат үлэтинэн хомууртан босхолонор көҥүллээх буолан, биир ыччат доруобуйатын туругунан төннүбүттэрэ. Оройуон дьаһалтата анал ыстаап тэрийэн, саллааттарга, кинилэр дьиэ кэргэттэригэр көмөнү оҥорууну иилиир-саҕалыыр.

— Тус хонтуруолбар тутан, саллааттар ийэлэрин кытта көрсө-билсэ турабыт. Арассыыйа Бэрэсидьиэнин уонна Ил Дархан Ыйаахтарынан мобилизацияламмыт саллааттар дьиэ кэргэттэригэр 200 тыһ. солк. кэмигэр төлөммүтэ. Кыра дохуоттаах дьиэ кэргэттэри социальнай хантараагынан үлэлииргэ кэпсэтии барар. Саллааттар дьонноро элбэх докумуону хомунан араас тэрилтэлэринэн сүүрбэккэ, МФЦ-га пааспардаах кэлэн, сайабылыанньа толороллоругар усулуобуйа тэриллибитэ.
Үтүө баҕаларынан быстах хомуурга барбыт саллааттар ийэлэригэр, дьиэ кэргэттэригэр көмөлөһөн сүүрэ-көтө сылдьар волонтердарбыт сайаапка киирдэ даҕаны, тута көмөҕө кэлэ охсоллоро хайҕаллаах. Ол курдук мас-муус бэлэмнээн, тиэйэллэр, бородуукталарын атыылаһыыга, оҕону көрүүгэ-истиигэ көмөлөһөллөр, уйулҕа туругун чөлгө түһэриигэ көмө эмиэ оҥоһуллар. Нэһилиэнньэ өттүттэн бу хамсааһыны өйүүллэр. Ол курдук ийэлэрбит, эбэлэрбит хомуйбут гуманитарнай көмөлөрүн Москваҕа ыытарга анаан Дьокуускайга диэри тиэрдэн биэрдим. Үс бэрэстэбиитэлбит баһыылкалары Ростовка тиэрдэр соруктаах бардылар. Өлөөнтөн икки бэрэстэбиитэлбит Бурятияҕа уонна Хабаровскайга үөрэтэр полигоҥҥа баар эрдэхтэринэ, уолаттарбытыгар байыаннай таҥас-сап, эмп-томп илдьэн туттарбыттара.

Бу күннэргэ Өлөөҥҥө «Амарах санаа харыйата» аһымал аахсыйа буола турар. Пуорум бочуоттаах ыалдьыттара АКБ «Алмаасэргиэнбаан» бэрэссэдээтэлин сүбэһитэ Людмила Николаеваны уонна бу баан бырабылыанньатын бэрэссэдээтэлин солбуйааччы Светлана Платонованы кытта мобилизацияламмыт дьоммут оҕолоругар кинилэр ааттара суруллубут Саҥа дьыллааҕы дьэрэкээн аккырыыккалары талан бэлэмнээтибит.
Анал пуондаҕа ый аайы оройуон бары тэрилтэлэриттэн, уопсастыбаннай түмсүүлэриттэн үбүнэн көмө киирэ турар. Маны сэргэ быстах хомуурга барбыт саллаат дьиэ кэргэнигэр бэриллэр төлөбүр билиҥҥи кэмҥэ туохха да тиийбэтин, ыал бары ипотекалааҕын, кирэдьииттээҕин, бэлиэтиир наадалаах. Нэһилиэк дьаһалталарыгар бу дьону туохха наадыйалларын ыйыталаһан-туоһулаһан, хонтуруолга ылалларыгар үлэ утумнаахтык барар. Өлөөн дьоно, ыраахпыт диэбэккэ, бу хамсааһынтан туора турбакка, бу курдук көмөҕө кытталлар, — диэн Лена Степановна кэпсээтэ.