Ленин проспега алтынньы ый бүтүөр диэри аһыллыаҕа

Ленин проспега быйыл алтынньы ый бүтүөр диэри аһыллыаҕа. Ол туһунан Ил Дархан Айсен Николаев суруналыыстары кытары көрсүһүү кэмигэр иһитиннэрдэ.

«Ленин проспегын туһунан эттэххэ, суолга хаайтарыыны, “пробканы” ким да сөбүлээбэт. Ол эрээри, куорат киин уулуссатын, атын да уулуссаларын алҕаһы таһаарбакка, хапытаалынайдык оҥоруохха наада. Хомойуох иһин, былырыын кыраапыктан хаалыы тахсыбыта, онон хойутаан, тымныы кэмҥэ оҥоһуллубут үлэлэр хос оҥоһуллаллар. Бэдэрээтчит бэйэтин суотугар итини көннөрөр. Үлэ кэмигэр, болдьоҕор оҥоһуллара суолталаах, онон бу сыл алтынньы бүтүөр диэри уулуссаларга толору сырыы көҥүллэниэҕэ. Бу суолу аспааллааһын эрэ үлэтэ буолбатах, тротуардары, уу, гаас, уот ситимнэрин уларытыы, көҕөрдүү – бу барыта кэлим үлэ. Дьокуускайга олус улахан кээмэйдээх үлэ ыытылла турар.», — диэн Айсен Николаев эттэ.