Ленинград төгүрүктээһинтэн босхоломмут күнүн ахтан-санаан аастыбыт

Харбалаахтааҕы үөрэхтээһин холбоһугун кытта олохтоох бибилэтиэкэ  сэбиэдиссэйэ Диана Егоровна Соломонова ыкса сибээстээхтик үлэлиир.

1941 сыл балаҕан ыйын 8 күнүттэн 1944 сыл тохсунньу 27 күнүгэр диэри  Ленинград куорат төгүрүктээһиҥҥэ (блокадаҕа)  түбэһэн, 872 күн  эрэйи-муҥу көрбүтэ.

Диана Егоровна  «Блокада килиэбэ» диэн кылаас чаастары ыытта.

Блокада килиэбин састаабын туттан буһарбыт килиэбин оҕолорго амсатан, оччотооҕу ыарахан кэм чахчытын билиһиннэрдэ.

Кини бу кылаас чааһын тэрийэригэр тыйаатыр артыыһа буоларга үөрэнэн испит саха ыччаттарын кынаттара сарбыллыбытын туһунан «Театр. Якутия. Ленинград.» кинигэни сүрүн тирэх оҥоһунна.

Үөрэнээччилэр олус долгуйа истэн баран ыйыталастылар, кинигэни ылан, сыныйан көрдүлэр.

Хаһан да маннык ыар түгэн хатыламматын, эйэлээх олох чэчирээтин!

Валентина КРИВОШАПКИНА, Харбалаах