Ленскэй күрэсчитэ киокусинкайга Аан дойду Куубагар боруонса мэтээли ылла

Ленскэйтэн төрүттээх Елизавета Дерменжи киокусинкайга Аан дойду Куубагар үс бастыҥ иһигэр киирэн, боруонса мэтээл кыайыылааҕынан буолла. Күрэхтэһии сэтинньи 1-2 күннэригэр Казань куоракка ыытылынна. Бу туһунан Ленскэй улууһун дьаһалтатын пресс-сулууспата иһитиннэрэр.

Елизавета Дерменжи дьахталлар ортолоругар 60 киилэҕэ диэри ыйааһыҥҥа киирсэн үрдүк ситиһиилэннэ. Уопсайа түһүлгэҕэ 21 дойдуттан 425 күрэсчит кытынна. Күрэхтэһии үс көрүҥүнэн ыытылынна: кёкусин ката, бөлөҕүнэн кёкусин ката уонна ыйааһынынан кёкусин.

«Елизавета Дерменжи ситиһиитэ Ленскэй улууска уонна өрөспүүбүлүкэҕэ улахан суолталаах. Кини кыайыыта – тыҥааһыннаах эрчиллиитин, сыалга дьулуурун уонна аан дойду таһымыгар бигэргэтиллибит үрдүк бэлэмин түмүгэ», — диэн Ленскэй улууһун дьаһалтатын дьыалатын управлениетын сүрүн исписэлииһэ Карина Богатых бэлиэтээтэ.