Ленскэй олохтооҕо куйаар ситимин нөҥүө сымыйа дастабырыанньаны атыылаһан көҥүлэ быһылынна

Олунньу 17 күнүгэр Ленскэй оройуонун суута олохтоох киһи сымыйа суоппар дастабырыанньатын туһаммытынан холуобунай дьыалаҕа бириигэбэри таһаарда. Эр киһи буруйу оҥорууга буруйдааҕынан ааҕылынна.

Ааспыт сыл кулун тутар ыйыгар тырааныспары ыытар быраабыгар эксээмэннэри кыайан туттарбакка, эр киһи 60 тыһыынча солкуобайга куйаар ситимин нөҥүө сымыйа дастабырыанньаны атыыласпыт. 2024 сыл ахсынньытыгар ДПС иниспиэктэрдэрэ суоппары тохтоппуттарыгар, эр киһи сымыйа докумуону көрдөрбүт. Бэрэбиэркэ кэмигэр ыйыллыбыт нүөмэрдээх дастабырыанньа атын киһи бас билэрэ биллибит.

Буруйдаах буруйун толору билиннэ уонна кэмсинэрин эттэ. Дьыала бары матырыйаалларын учуоттаан, суут эр киһини сыл аҥаарыгар көҥүлүн быһарга уураах таһаарда. Бириигэбэр сокуоннай күүһүгэр киирэ илик.