Ленскэй олохтооҕуттан 400 тыһ. солк. суумалаах сир арендатын иэһэ ирдэннэ

Ленскэй оройуонун суута Ленскэй куорат дьаһалтатын ирдэбилинэн олохтоох киһиттэн сир учаастагын арендатыгар үөскээбит иэһин толору ирдээтэ.

Суут быһаарыытынан, 2013 сыллаахха дьаһалта уонна буруйдаах икки ардыларыгар сир учаастагын арендалааһыҥҥа дуогабар түһэрсиллибит. Арендатор төлөбүрдэри кэмигэр төлөөн испэтэх, онон түмүгэр улахан суума иэс үөскээбит. Иэс уопсай суумата 303 569,2 солк. уонна пеня 94 306,22 солк. буолбута быһаарыллыбыт.

Администрация олохтоох киһиттэн сууманы барытын ирдииргэ модьуйбут эрээри, иэстээх киһи суут урукку быһаарыыларынан сорох иэс сууматын төлөөбүтүн, учаастагы бас билиигэ биэрии кэннэ арендалыыр эбэһээтэлистибэ тохтотуллуохтааҕын туруорсубут.

Түмүгэр суут быһаарыытынан арендаҕа төлөбүрдэри төлүүр эбээһинэс олохтоммутунан, дуогабар эбээһинэһин толорботох чахчынан иэс сууматын толору көрдөөн ыларга уураахтаата. Билиҥҥитэ быһаарыы сокуоннай күүһүгэр киирэ илик уонна суут бэрээдэгинэн көннөрүллүөн сөп. Бу туһунан киин куорат суутун пресс-сулууспата суруйар.