Ленскэй олохтоохторо үгэс буолбут субуотунньукка таҕыстылар

Икки ыйдаах ырааһырдыы тэрээһинин чэрчитинэн Ленскэй улууһун олохтоохторо үгэс буолбут ыам ыйынааҕы субуотунньукка таҕыстылар.

Тэрээһини СӨ экологияҕа министиэристибэтин Ленскэйдээҕи экологическай кэтээн көрүү судаарыстыбаннай кэмитиэтин үлэһиттэрэ сүрүннээтилэр. Судаарыстыбаннай иниспиэктэрдэр куорат олохтоохторун кытары өрүс кытылын бөхтөн-сыыстан ыраастаатылар.

Ленскэй улууһугар сыл аайы бэйэлэрин баҕаларынан тахсан субуотунньукка кыттар көхтөөх дьон элбэх. Маннык үгэс буолбут субуотунньуктар олохтоохтору уонна үлэ кэлэктииптэрин түмэллэр диэн Экология министиэристибэтин пресс-сулууспата иһитиннэрэр.

Биһиги олорор сирбит ыраас буоларыгар кыһаллабыт. Бу барыта улууспут олоҕо сайдарыгар, тупсарыгар, уйгута улаатарыгар улахан суолталаах дииллэр ленскэйдэр.